24 اکتوبر ، 2022 
گلشن اقبال میں آتشزدگی سے دو بھائیوں کی ہلاکت، ویڈیو جیو نیوز کو موصول
24 اکتوبر ، 2022
کراچی: گلشن اقبال میں رہائشی فلیٹ میں آگ لگنے سے 2 نوجوان بھائی جاں بحق ہوگئے جب کہ واقعہ کی سی سی ٹی وی فوٹیج جیو نیوز نے حاصل کرلی۔
گلشن اقبال بلاک 11 میں رہائشی فلیٹ نعمان ٹیرس میں آگ لگنے کے واقعہ کے فوراً بعد کی سی سی ٹی وی ویڈیو جیو نیوز نے حاصل کی۔
ویڈیو میں دیکھا جاسکتا ہےکہ نوجوان طلحہ آگ لگنے کے بعد گھر سے باہر آتا ہے تو اس کے جسم سے آگ کے شعلے اٹھ رہے ہوتے ہیں، طلحہ مرکزی گیٹ تک جاتا ہے پھر واپس اندرآتا ہے۔
ویڈیو میں دیکھا جاسکتا ہے کہ فلیٹ کے ایک شخص نے جب طلحہ کو شعلوں میں لپٹا دیکھا تو اس پر پانی پھینک کر آگ بجھانے کی کوشش کی۔
پولیس کے مطابق واقعہ میں نوجوان طلحہ اور اس کا بھائی حمزہ جھلس کر جاں بحق ہوگئے جب کہ گھر کے دیگر 3افراد آگ سے جھلس کر زخمی ہوگئے۔
ابتدائی تحقیقات کے مطابق آگ لگنے کا واقعہ شارٹ سرکٹ کے باعث چارجنگ پر لگا موبائل پھٹنے سے پیش آیا، دونوں نوجوان زمین پر سورہے تھے،موبائل پھٹنے سے گدے پر آگ لگی جس سے نوجوان آگ کی لپیٹ میں آگئے۔
