01 نومبر ، 2022 
اے بی ڈی ویلیئرز بابر اعظم کی حمایت میں بول پڑے
01 نومبر ، 2022
جنوبی افریقی کرکٹ ٹیم کے سابق کپتان اور مایہ ناز بلے باز اے بی ڈی ویلیئرز پاکستان کرکٹ ٹیم کےکپتان بابر اعظم کی حمایت میں بول پڑے۔
اپنے یوٹیوب چینل پر گفتگو کرتے ہوئے اے بی ڈی ویلیئرز کا کہنا تھا کہ بابر اعظم ایک بہترین کھلاڑی ہے، جب میں نے پہلی بار بابرکو دیکھا تھا تو تب ہی کہہ دیا تھا کہ یہ لڑکا کھیل سکتا ہے۔
اے بی ڈی ویلیئرز کا کہنا تھا کہ بابر اعظم پاکستان کی کامیابیوں میں شاندار اضافہ ہے، باصلاحیت نوجوان کھلاڑیوں کا سامنے آنا حوصلہ افزا بات ہے۔
سابق جنوبی افریقی بیٹرکا کہنا تھا کہ ٹیموں پر ہمیشہ ایسا مشکل وقت آتا ہے جب اس کے اہم بلے باز فارم میں نہیں ہوتے۔
اے بی ڈی ویلیئرز کا کہنا تھا کہ پاکستان کی بیٹنگ لائن ہمیشہ سے مشکلات کا شکار رہی ہے اور اسے ہمیشہ اتار چڑھاؤ کا سامنا رہا ہے تاہم اب محسوس ہوتا ہےکہ بابر اور رضوان کی وجہ سے پاکستانی بیٹنگ میں مستقل مزاجی آئی ہے۔
خیال رہےکہ حالیہ کچھ میچز میں خراب پرفارمنس پر بابر اعظم کو تنقید کا سامنا ہے اس دوران بعض سابقہ کھلاڑیوں نے بابر کی حمایت اور حوصلہ افزائی بھی کی ہے۔
یاد رہے کہ ٹی ٹوئنٹی ورلڈکپ میں پاکستان نے اپنا آئندہ میچ 3 نومبر کو سڈنی میں جنوبی افریقا سے کھیلنا ہے۔
