12 دسمبر ، 2022 
نیوکراچی میں 3 بھائیوں کے قتل کا معمہ حل ہوگیا
12 دسمبر ، 2022
نیوکراچی کے علاقے گبول ٹاؤن میں گذشتہ ہفتے تین بھائیوں کا قتل علاقے کے منشیات فروش گروہوں کے مابین تنازع کا شاخسانہ قرار دیا گیا ہے۔
فائرنگ سے تہرے قتل کی واردات میں ملوث 2 ملزمان کو حراست میں لے لیا گیا ہے۔
پولیس ذرائع کے مطابق حراست میں لیے گئے دونوں ملزمان پیشہ ور منشیات فروش ہیں، مقتولین میں سے ایک بھائی اس علاقے میں مبینہ طور پر منشیات فروشی میں ملوث تھا۔
پولیس ذرائع کے مطابق کچھ دن قبل مقتول کا منشیات فروشوں کے ساتھ جھگڑا بھی ہوا تھا۔
پولیس ذرائع کے مطابق واردات کے مرکزی ملزم اور اس کے ساتھیوں کی تلاش جاری ہے۔ واقعے کا مقدمہ تینوں مقتولین کے چچا علی محمد کی مدعیت میں درج ہے۔
واضح رہے کہ سعید، نذر اور خیال کو 10 دسمبر کی شب فائرنگ کرکے قتل کیا گیا تھا۔
پولیس کے مطابق ملزمان کی شناخت غلام مصطفیٰ ، شہباز اور غلام نبی کے ناموں سے ہوئی ہے۔
پولیس کا کہنا ہے کہ ملزمان پیشہ ور منشیات فروش ہیں، گرفتاری تکنیکی مہارت سے عمل میں آئی، ملزمان مچھر کالونی سہراب گوٹھ کے رہائشی ہیں، گرفتار ملزمان کے قبضے سے اسلحہ بھی برآمد کرلیا گیا ہے اور ان سے تفتیش کا سلسلہ جاری ہے۔
پولیس کا کہنا ہے کہ فائرنگ کرنے والے مرکزی ملزمان کا تعین ہوگیا ہے جن کی گرفتاری کیلئے چھاپے مارے جا رہے ہیں، گرفتار افراد واقعے کے وقت فائرنگ کرنے والے ملزمان کے ہمراہ تھے۔
