03 جنوری ، 2023 
حافظ نعیم کے الزامات پر ترجمان گورنر ہاؤس کا ردعمل
03 جنوری ، 2023
ترجمان گورنر ہاؤس کا کہنا ہےکہ امیر جماعت اسلامی کراچی حافظ نعیم الرحمان کے الزامات میں کوئی صداقت نہیں،گورنرکی تعیناتی آئین و قانون کے مطابق ہوئی ہے۔
ترجمان گورنر ہاؤس نے جماعت اسلامی کراچی کے امیر حافظ نعیم الرحمان کی پریس کانفرنس پر ردعمل ظاہرکرتے ہوئے کہا کہ گورنرکے عہدے پر تعیناتی آئین و قانون کے مطابق ہوئی ہے۔
ترجمان کے مطابق گورنر سندھ حافظ نعیم الرحمان کو اچھا دوست سمجھتے ہیں اور رات میں گورنرسندھ سے حافظ نعیم کی گرم جوشی سے ملاقات بھی ہوئی۔
ترجمان گورنر ہاؤس کا کہنا ہےکہ حافظ نعیم کو اگر شکایت تھی تو بطور دوست گورنرسندھ کو بتانا چاہیے تھا،گورنرسندھ کامران ٹیسوری شہر قائد کی روشنیوں کی بحالی کے لیے تمام اسٹیک ہولڈرز سے رابطہ کر رہے ہیں اور اسی مقصد سے وہ جماعت اسلامی کے دفتر بھی گئے تھے۔
