05 جنوری ، 2023 
کراچی: ڈاکوؤں نے مزاحمت پر خاتون کو گولی مار کر قتل کردیا
05 جنوری ، 2023
کراچی میں اسٹریٹ کرمنلز بے قابو ، گلستان جوہر میں ڈکیتی مزاحمت پر خاتون کو قتل کردیاگیا۔
مقتولہ ثنا اپنے بھائی کے ساتھ میڈیکل اسٹور پر آئی تھی، بھائی کار سے اترکر میڈیکل اسٹور دوا لینے گیا، اسی دوران ملزمان آئے اور لوٹ مار پر مزاحمت کے دوران فائرنگ کردی۔
کراچی والے ڈاکوؤں کے رحم و کرم پر، مسلح ملزمان راہ چلتے کسی کو بھی کہیں بھی لوٹ لیتے ہیں اور تھوڑی سی بھی مزاحمت پر گولی مار کے فرار ہو جاتے ہیں۔
تازہ واقعہ گلستان جوہر بلاک 17 میں پیش آیا جہاں ملزمان نے ڈکیتی کی واردات کے دوران مزاحمت پر فائرنگ کر دی۔ گولی خاتون کی گردن پر لگی جس سے وہ موقع پر ہی جاں بحق ہو گئی، مقتولہ کی لاش ضابطے کی کارروائی کیلئے جناح اسپتال منتقل کردی گئی ہے۔
واقعے کی اطلاع ملتے ہی پولیس جائے وقوع پر پہنچی اور شواہد اکھٹے کرلیے، پولیس نے مقتولہ کی شناخت ثنا زوجہ طارق کے نام سے ظاہر کی ہے۔ مقتولہ ثنا اپنے بھائی کے ساتھ میڈیکل اسٹور پر آئی تھی، بھائی کار سے اترکر میڈیکل اسٹور دوا لینے گیا تھا اسی دوران ملزمان آگئے اور لوٹ مار پر مزاحمت کے دوران فائرنگ کردی۔
واضح رہے کہ ڈکیتی مزاحمت پر سال 2023 کے پہلے ہی ہفتے میں ڈکیتی مزاحمت میں قتل کا یہ دوسراواقعہ ہے۔
پہلا قتل 4 جنوری کو کورنگی بلال کالونی میں ہوا تھا۔
