امریکی وزیر خارجہ کی پشاور دھماکے کی مذمت

امریکی وزیر خارجہ انٹونی بلنکن نے پشاور میں پولیس لائنز کی مسجد پر دہشتگرد حملے کی مذمت کرتے ہوئے سانحے میں جاں بحق افراد کے لواحقین سے اظہار تعزیت کیا ہے۔

اپنے بیان میں امریکی وزیر خارجہ انٹونی بلنکن نے کہا کہ بے حس دہشتگرد حملے کے نتیجے میں اپنے پیاروں سے بچھڑنے والے خاندانوں کے ساتھ تعزیت کا اظہار کرتے ہیں۔

انہوں نے کہا کہ سانحے کے متاثرین سکیورٹی کے لوگ تھے جنہوں نے اپنی زندگیاں داؤ پر لگائیں۔

’اقامت آدھی ہوئی تو دھماکا ہوگیا‘، پشاور دھماکے کے عینی شاہد کی گفتگو

پشاور کے علاقے صدر پولیس لائنز میں نماز ظہر کے دوران خودکش حملہ کیا گیا تھا جس کے شہدا کی تعداد 100 ہوگئی ہے۔

اپنے بیان میں انہوں نے کہا کہ شہریوں پرہرقسم کے تشدد کے خلاف امریکا پاکستان کے ساتھ کھڑا ہے، دہشتگردی سے نمٹنے کی کوششوں پر پاکستانی حکومت کے ساتھ ہیں۔

امریکی وزارت خارجہ کے نائب ترجمان ویدانت پٹیل نے کہا ہے کہ پاکستانی حکام کے ساتھ باقاعدہ رابطے میں ہیں، افغانستان میں جاری صورتحال پر بات کیلئے خصوصی ایلچی اسلام آباد گئے تھے۔