09 مارچ ، 2023 
کراچی کے مختلف علاقوں میں پولیس کے مقابلے، 3 ڈاکو ہلاک
09 مارچ ، 2023
کراچی میں پولیس نے رات گئے ڈاکوؤں کیخلاف کارروائی کی جس میں تین ڈاکو ہلاک ہوگئے۔
پولیس کے مطابق ڈاکوؤں کے خلاف مقابلے سائٹ ایریا، لانڈھی، لیاری اور نارتھ کراچی میں ہوئے جس دوران 3 ڈاکو ہلاک ہوئے اور 6 کو گرفتار کیا گیا۔
پولیس نے اہلکار کی شہادت اور زخمی ہونے کے واقعے پر سائٹ ایریا میں اسنیپ چیکنگ بڑھادی تھی، اس دوران اسٹار مل کےقریب 2 موٹرسائیکلوں پر سوار 4 ملزمان کو رکنے کا اشارہ کیا تو انہوں نے پولیس پر فائرنگ کرکے فرار ہونے کی کوشش کی جس پر پولیس کی جوابی فائرنگ سے 2 ملزمان ہلاک 2 فرار ہوگئے، ملزمان کے قبضے سے 2 پستول، 3 موبائل فون اور موٹرسائیکل ملی ہے۔
دوسری جانب پولیس کے مطابق لانڈھی نمبر 4 میں مقابلے کے دوران ایک ڈاکو ہلاک اور تین کو زخمی حالت میں گرفتار کیا گیا۔
پولیس کے مطابق لیاری موسیٰ لین میں مقابلے کے بعد ایک ملزم کو زخمی حالت میں گرفتار کرلیا گیا، ملزم ضیاالحق نے زخمی حالت میں اسلحہ کہیں پر پھینک دیا ہے۔
ادھر پولیس نے نارتھ کراچی سیکٹر 5 سی 2 میں مقابلہ کیا جس دوران 2 ڈاکوؤں کو زخمی حالت میں گرفتار کرلیا گیا جن کے قبضے سے دو پستول برآمد ہوئے۔
