رضوان کو کمر کی تکلیف، آج کے میچ میں آرام دیے جانے کا امکان

نیوزی لینڈ کے خلاف تیسرے ٹی ٹوئنٹی میچ میں وکٹ کیپر بیٹر محمد رضوان کو آرام دیے جانے کا امکان ہے۔

ذرائع کے مطابق محمد رضوان کمر کی تکلیف سے چھٹکارا اب تک نہیں پاسکے، ان کی کمر کی تکلیف کا آج پھر جائزہ لیا جائے گا جس کے بعد رضوان کو کھلانے یانہ کھلانے کا فیصلہ ہوگا۔

ذرائع کا کہنا ہے کہ محمد رضوان کی جگہ پلیئنگ الیون میں محمد حارث شامل ہوں گے تاہم رضوان کی تکلیف سنجیدہ نوعیت کی نہیں ہے، انہیں  احتیاطی طور پر آرام دیا جاسکتا ہے۔

واضح رہے کہ دوسرے ٹی ٹوئنٹی میچ میں سویپ کرتے ہوئے محمد رضوان کی کمر میں کھچاؤ پڑا تھا۔

 پاکستان اور نیوزی لینڈ کے درمیان تیسرا ٹی ٹوئنٹی میچ آج کھیلا جائے گا، پاکستان کو پانچ میچز کی سیریز میں دو صفر کی برتری حاصل ہے۔