02 مئی ، 2023 
پاکستان
اورنگی ٹاؤن میں نالے میں گرنے والے 2 سالہ بچے کی لاش نکال لی گئی
02 مئی ، 2023
کراچی کے علاقے اورنگی ٹاؤن میں والدین کے ہمراہ موٹر سائيکل سے نالے میں گرنے والے بچے کی لاش نکال لی گئی۔
حادثہ گزشتہ شب اورنگی ٹاؤن میں پیش آیا جہاں نالے پر حفاظتی دیوار نہ ہونے کے باعث 2 سالہ اذان اور اُس کے والدین کی موٹر سائیکل گری۔
متاثرہ خاندان کا بتانا ہے کہ بارش کے بعد پانی جمع ہوا تو نالے پر بنے پل کی پختہ سطح اور نالے کے پانی کی سطح برابر ہوگئی۔ موٹر سائیکل گرنے کے بعد ماں باپ تو کسی طرح باہر نکل آئے مگر ان کے لخت جگر کی لاش ریسکیو اہلکاروں کو کئی گھنٹے بعد ملی۔
بچے کی نماز جنازہ گھر کے قریب مسجد میں ادا کردی گئی۔ علاقہ مکینوں نے مطالبہ کیا ہے کہ نالے کے اطراف میں دیوار قائم کی جائے تاکہ شہریوں کی جان محفوظ رہ سکے۔
