کراچی … کراچی میں ٹارگٹ کلنگ کا سلسلہ آج بھی جاری ہے، مختلف علاقوں میں فائرنگ اور دیگر واقعات میں ڈی ایس پی کے بیٹے اور مذہبی جماعت کے کارکن سمیت 5 افراد جا بحق ہوگئے۔ نمائندہ جیو نیوز عاصم بھٹی کے مطابق گلشن اقبال کے علاقے موتی محل کے قریب نامعلوم افراد نے کار پر فائرنگ کردی جس کے نتیجے میں2 افراد زخمی ہوگئے ، تاہم ایک شخص زخموں کی تاب نہ لاتے ہوئے جاں بحق ہوگیا۔ واقعے کے بعد علاقے میں خوف و ہراس پھیل گیا۔ پولیس کے مطابق اورنگی ٹاوٴن نمبر 5 میں نامعلوم افراد کی فائرنگ سے غلام حیدر جاں بحق اور ایک شخص زخمی ہو گیا، مقتول اہلسنت والجماعت کا کارکن تھا۔ پرانا حاجی کیمپ سے ایک شخص کی لاش ملی ہے جس کی شناخت نہیں ہوسکی ہے۔ پولیس نے لاش کو ضابطے کی کارروائی کیلئے اسپتال منتقل کردیا ہے۔ ڈیفنس کے علاقے فیز فائیو میں نامعلوم افراد نے گاڑی پر فائرنگ کرکے ایک نوجوان کو ہلاک کردیا، مقتول کی شناخت شاہ زیب کے نام ہوئی ہے۔ پولیس کے مطابق مقتول ڈی ایس پی اورنگزیب کا بیٹا تھا جو اپنی بہن کے ولیمے سے واپس جارہا تھا۔ اس سے قبل گلشن اقبال بلاک نمبر 6 سے ایک شخص کی لاش ملی ہے جس کی تاحال شناخت نہیں ہوسکی ہے۔