15 مئی ، 2023
کرکٹر محمد عامر کا کہنا ہے کہ پی ایس ایل کے دوران بابر اعظم اور ٹیل اینڈر کو بولنگ کروانے سے متعلق میرے بیان کو ویوز اور چورن بیچنے کیلئے بڑھا چڑھا کر پیش کیا گیا۔
حال ہی میں دیے گئے ایک انٹرویو کی ویڈیو محمد عامر کی جانب سے اپنے یوٹیو ب چینل پر بھی شیئر کی گئی جس میں انہیں بابر اعظم کی کپتانی اور پی ایس ایل کے دوران دیے گئے اپنے بیان سے متعلق وضاحت پیش کرتے دیکھا گیا۔
ایشیا کپ اور پھر میں ورلڈکپ میں ٹیم کی کپتانی سے متعلق فاسٹ بولر محمد عامر کا کہنا تھا کہ ہیڈ کوچ کے اعلان کے بعد اب پی سی بی کو پاکستان ٹیم کیلئے کپتان کا اعلان بھی کردینا چاہیے کیوں کہ اب ورلڈکپ میں زیادہ وقت نہیں، اب کپتان کی تبدیلی کا کوئی جواز نہیں بنتا، اب پی سی بی کو بابر اعظم کو بھی واضح کردینا چاہیے کہ وہی کپتان ہوں گے تاکہ انہیں بھی واضح ہوجائے اور وہ پی سی بی کی مینجمنٹ کے ساتھ مل کر ٹیم کیلئے منصوبہ بندی کرسکے۔
انہوں نے کہا کہ بابر ورلڈکپ کے حوالے سے پاکستان ٹیم کیلئے بہترین ہے، بابر دو ورلڈکپ اور ایشیا کپ کیلئے پاکستان ٹیم کی قیادت کرچکا ہے، اب پاکستان ٹیم کے پاس بابر کے علاوہ کوئی بہتر آپشن بھی نہیں کیوں کہ ورلڈکپ کیلئے کسی بھی ٹیم کو ایک تجربہ کار کپتان چاہیے ہوتا ہے اور بابر کے پاس اب تجربہ بھی ہے لہٰذا پی سی بی کو بھی اب بابر اعظم کے لیے بطور کپتان اعلان کردینا چاہیے ۔
دوسری جانب سے محمد عامر نے پی ایس ایل کے دوران بابر کو ٹیل اینڈر کہنے سے متعلق بیان پر وضاحت دیتے ہوئے کہا ’میرا ان لوگوں سے سوال ہے جنہوں نے اس بیان کو غلط طریقے سے پیش کیا، ایسے لوگ مجھے میرا کوئی ایک انٹرویو بھی ایسا نکال کر دکھا دیں جس دوران میں نے کہا ہو کہ بابر میرے لیے ایک ایوریج پلیئر ہے یا فارغ ہے، میں نے اپنے ہر انٹرویو میں بابر کو پاکستان کا بہترین پلیئر تسلیم کیا ہے میں یہ کہہ چکا ہوں کہ بابر کی تکنیک کی وجہ سے بابر کو ون ڈے اور ٹیسٹ میچز میں بولنگ کرنا مشکل ہے، پھر میں یہ کیوں کہوں گا وہ میرے لیے ٹیل اینڈر جیسا کھلاڑی ہے۔
فاسٹ بولر نے یہ بھی کہا اس روز میرے کہنا کا مقصد یہ تھا کہ بولنگ کے دوران میرے سامنے بابر اعظم ہو یا کوئی ٹیل اینڈر کھلاڑی، میرے لیے وکٹ لینا زیادہ اہم ہے، کیوں کہ اس سے ٹیم کو فائدہ ہوتا ہے، بابر سے متعلق میرے بیان کو کچھ لوگوں نے جنہیں ویور شپ چاہیے ہوتی انہوں نے غلط انداز میں پیش کیا، رہی بات میری اور بابر کی تو ہم جب بھی ملتے ہیں بابر میری عزت کرتا ہے اور میں بابر کو آج بھی پاکستان کا بہترین پلیئر مانتا ہوں، ہماری کوئی ذاتی لڑائی نہیں۔