22 مئی ، 2023 
فنی خرابی کا شکار طیارہ کوئٹہ ائیرپورٹ پر گراؤنڈ، پرواز کل اسلام آباد جانے کی امید
22 مئی ، 2023
کوئٹہ ائیرپورٹ پر فنی خرابی کے شکار پی آئی اے کے طیارے کو گراؤنڈ کردیا گیا ہے، مسافر گھروں کو چلے گئے جبکہ پرواز کے منگل کی سہہ پہر اسلام آباد روانہ ہونے کی امید ظاہر کی گئی ہے۔
پرواز پی کے 326 پیر کی دوپہر ایک بجے کوئٹہ سے اسلام آباد کیلئے روانہ ہورہی تھی اور طیارہ رن وے پر 194 کلومیٹر فی گھنٹہ کی رفتار پر گیا تو پائلٹ نے فنی خرابی محسوس کرتے ہوئے اچانک ٹیک آف منسوخ کر دیا۔
پائلٹ نے ایک ٹریفک کنٹرول کو کاک پٹ میں شیئر ونڈز، تیز ہواؤں اور بریکس گرم ہونے کی نشاندہی کی۔ ائیر بس اے 320 طیارہ بغیر کسی مدد کے اپنی پارکنگ تک پہنچا، انجینیئرز نے معائنہ کیا۔
ائیرپورٹ حکام کے مطابق طیارے کی اگلی پرواز سول ایوی ایشن اتھارٹی ( سی اے اے) ائیر وردی نیس کی جانب سے کلیئرنس سے مشروط ہونے کی وجہ سے پرواز کی روانگی روک دی گئی۔
ائیرپورٹ منیجر ملک مظہر اعوان نے بتایا کہ مسافروں کو طیارے سے آف لوڈ کردیا گیا تھا، بعدازاں انہیں گھروں کو روانہ کر دیا گیا۔
ملک مظہر اعوان کے مطابق طیارے کی مکمل فٹنس کیلئے درکار کچھ پرزے منگل کو کوئٹہ پہنچیں گے۔ پرواز پی کے 326 ممکنہ طور پر منگل کی سہ پہر اسلام آباد کے لیے روانہ ہوسکے گی۔
