23 جون ، 2023 
بلڈر سے بھتا طلب کرنے پر سندھ بلڈنگ کنٹرول اتھارٹی کے 3 انسپکٹرز گرفتار
23 جون ، 2023
کراچی پولیس نے صدر کے علاقے میں زیر تعمیر عمارت کے بلڈر سے بھتا طلب کرنے پر سندھ بلڈنگ کنٹرول اتھارٹی (ایس بی سی اے) کے 3 سینیئر انسپکٹرز کو گرفتار کرلیا۔
ایس ایس پی ساؤتھ اسد رضا کے مطابق پریڈی پولیس کی جانب سے گرفتار افسران میں ایس بی سی اے کے 3 سینیئر افسران، بلڈنگ انسپکٹر عمیر کریم، امین اور ظفر عرف سپاری شامل ہیں جبکہ ڈپٹی ڈائریکٹر سید اویس حسین اور ضیا عرف کالا فرار ہیں۔
پولیس کے مطابق گرفتار اور فرار ملزمان نے ایم اے جناح روڈ پر زیر تعمیر عمارت کے بلڈر سے 40 لاکھ روپے بھتا طلب کیا تھا جبکہ وہ لوگ پہلے مرحلے میں 5 لاکھ روپے وصول کر چکے تھے، ملزمان بھتے کی بقایا رقم لینے پہنچے تو انہیں گرفتار کرلیا گیا۔
بھتا خوری کے معاملے کا مقدمہ سید بلال نجیب کی مدعیت میں پریڈی تھانے میں درج کیا گیا ہے، مقدمے میں بھتا خوری اور دہشتگردی کی دفعات شامل کی گئی ہیں۔
