کانگریس سے مودی کے خطاب کے دوران شیلا جیکسن نے 6 بارکھڑے ہوکر تالیاں بجائیں

بھارتی وزیراعظم نریندر مودی نے کانگریس کے مشترکہ اجلاس سے خطاب کیا مگر امریکا کے صدر جوبائیڈن کی ڈیموکریٹک پارٹی کے 6 اراکین نے بھارتی وزیراعظم پر شدید تنقید کرتے ہوئے ان کی تقریر کے بائیکاٹ کا پہلے ہی اعلان کردیا تھا تاہم کانگریس میں پاکستانی کاکس کی چیئرپرسن شیلا جیکسن نے نہ صرف نریندرمودی سے ایوان میں دوبار ملاقات کی بلکہ اپنا موبائل فون ساتھی رکن کو دے کر ملاقات کا منظر کیمرے میں محفوظ بھی کرالیا۔

بھارتی وزیراعظم کانگریس کے مشترکہ اجلاس سے خطاب کیلئے آئے تو کانگریس میں پاکستانی کاکس کی چیئرپرسن شیلا جیکسن اپنی سیٹ سے اٹھ کرنریندر مودی کا استقبال کرنے بڑھیں، مصافحہ کیا، نریندر مودی نے ان کا بازو تھپتھپایا۔

دونوں کی مختصر بات چیت بھی ہوئی۔

نریندر مودی آگے بڑھے تو ان کے پیچھے موجود شیلا جیکسن بھارتی وزیراعظم کے اعزاز میں دیر تک تالیاں بجاتی رہیں۔

بھارتی وزیراعظم کی کانگریس کے مشترکہ اجلاس سے تقریر کا ایک روز پہلے ہی بائیکاٹ کا اعلان کرنے والوں میں مشی گن کی مسلم رکن کانگریس رشیدہ طلیب، منی سوٹا کی مسلم رکن کانگریس الہان عمر، میزوری کی رکن کانگریس کُوری بش، پنسلوینیا کی رکن کانگریس سمر لی، نیویارک کی رکن کانگریس الیگزینڈریا اوکاسیو کارٹز اور نیویارک ہی کے رکن کانگریس جمال باومین بھی شامل تھے۔

مسلم رکن رشیدہ طلیب کا کہنا تھا کہ مودی سرکار کی طویل تاریخ رہی ہے کہ وہ انسانی حقوق کی خلاف ورزیوں، غیرجمہوری اقدامات، مسلمانوں اور مذہبی اقلیتوں کو ہدف بنانے اور صحافتی پابندیوں میں ملوث رہی ہے جو ناقابل قبول ہے۔

کانگریس پرسن کارٹیز کا کہنا تھاکہ مشترکہ اجلاس سے خطاب کانگریس کی جانب سے انتہائی احترام کی علامت ہوتا ہے، یہ ایسے شخص کیلئے نہیں ہونا چاہیے جن کا انسانی حقوق سے متعلق ریکارڈ تکلیف دہ رہا ہو۔ خاص طورپر ایسے افراد جو امریکی محکمہ خارجہ کے مطابق مذہبی اقلیتوں اورنچلی ذات کے افراد کے انسانی حقوق کی خلاف ورزیوں میں ملوث رہے ہوں۔

ان 6 اراکین کانگریس کے برعکس پاکستانی کاکس کی چیئرپرسن مودی کی تقریر کےدوران انہیں کھڑے ہو کر داد دینے والوں میں بھی شامل تھیں، کئی جوان اراکین تو بیٹھے رہے مگر 73 برس کی شیلا جیکسن نے کم سے کم 6 بار نشست سے کھڑے ہوکر تالیاں بجائیں۔

نریندر مودی کی تقریر ختم ہوئی توکئی اراکین کانگریس نے بھارتی وزیراعظم سے آٹوگراف لیے، اس موقع پر شیلا جیکسن نے اپنا موبائل فون ساتھی رکن کانگریس کو دیا، نریندر مودی سے ملاقات کیلئے ایک بار پھر آگے بڑھیں اور ان سے مختصر بات چیت کی۔

ساتھی رکن کانگریس نے موبائل فون پر یہ منظر محفوظ کرکے شیلا جیکسن کیلئے لمحات یادگار بنادیے۔