04 جولائی ، 2023 
اسلام آباد کے نجی اسپتال کے انکیوبیٹر میں آگ لگنے سے بچی کی ٹانگیں جھلس گئیں
04 جولائی ، 2023
وفاقی دارالحکومت کے نجی اسپتال میں پیر کی شام کی بارش سے بجلی کی فلکچوئیشن کے سبب نرسری کا بلب پھٹنے سے انکیوبیٹر میں آگ لگ گئی جس کے نتیجے میں زیر علاج نومولود بچی کی دنوں ٹانگیں جھلس گئیں۔
بچی کے والد کا کہنا ہے اسپتال انتظامیہ نے لاپرواہی چھپانے کیلئے پٹی کر دی اور انفیکشن کا کہہ کر 5 روز بعد بچی لینے آنے کو کہا، ہم نے زبردستی بچی پمز اسپتال میں لے جا کر زیر علاج کروائی ہے۔
اسلام آباد کے علاقے ترامڑی کے نجی اسپتال کی نرسری میں پیر کی شام ہونے والی بارش کے دوران بجلی کی فلکچوئیشن کے سبب بلب پھٹ کر انکیوبیٹر پر گرا جس سے پولیتھین شیٹ کو آگ لگ گئی۔
آگ کے سبب نومولود بچی کی دونوں ٹانگیں جھلس گئیں، بچی کے والد سید احسن کہتے ہیں کہ نجی اسپتال کے عملے کی لاپرواہی اور والٹیج زائد ہونے سے ننھی کلی شدید قرب کا شکار ہوئی، اسپتال حکام نے پٹی کر کے انفیکشن کا شکار ہونے کا کہا اور پانچ روز بعد بچی لے کر جانے پر اصرار کیا جس پر زبردستی بچی لےکر اسپتال سے روانہ ہوئے۔
اس حوالے سے پمز اسپتال کے ترجمان کا کہنا ہے کہ ایگزیکٹو ڈائریکٹر ڈاکٹر رانا عمران نے خصوصی بورڈ تشکیل دے کر بچی کو فوری بہترین علاج کی سہولیات میسر کرنے کی ہدایات کی ہیں، ایک ہفتے تک کم از کم بچی کو انتہائی نگہداشت میں رکھا جاے گا، فی الحال سرجری کیے جانے کا فیصلہ قبل از وقت ہے۔
