10 ستمبر ، 2023 
کراچی میں ٹول ٹیکس مانگنے پر کار سوار نے کیشیئر کو گولی مار دی
10 ستمبر ، 2023
کراچی میں موچکو ٹول پلازہ پرٹول ٹیکس مانگنے پرکار سوار نے فائرنگ کرکے کیشیئر کو زخمی کردیا۔
پولیس کے مطابق موچکو ٹول پلازہ پرٹول ٹیکس مانگنے پر تلخ کلامی ہوئی جس کے بعد کار سوار نے گاڑی سے اسلحہ نکال لیا۔
ملزم نے کیشیئر پر فائرنگ کی جس سے وہ زخمی ہوگیا جبکہ ملزم واقعے کے بعد فرار ہوگیا۔
واقعے کی سی سی ٹی وی بھی سامنے آگئی جس میں ملزم کا چہرہ اور گاڑی نمبر واضح ہے۔
دوسری جانب کیماڑی میں حب ریور روڈ کے موچکو ٹول پلازہ پر ٹیکس مانگنے پر فائرنگ کرنے والے کار سوار کے خلاف موچکو تھانے میں مقدمہ درج کر لیا گیا۔
سینیئر سپرنٹنڈنٹ پولیس (ایس ایس پی) کیماڑی عارف اسلم راؤ کے مطابق زیر دفعہ 324 درج کی گئی ہے جس میں کار نمبر BAZ-505 کہ نامعلوم ڈرائیور کو نامزد کیا گیا ہے، فائرنگ سے زخمی ہونے والے ٹول پلازہ کیشیئر ابرار احمد اس مقدمے میں مدعی ہیں۔
پولیس کا کہنا ہے کہ زخمی سول اسپتال میں زیر علاج ہے اور مقدمے کی تفتیش انویسٹی گیشن شعبے کو منتقل کر دی گئی ہے۔
