فضائی سفر کے بغیر دنیا کے ہر ملک کو گھومنے والے شخص نے کتنا خرچہ کیا؟

ڈنمارک سے تعلق رکھنے والے تھورب جورن پیڈرسن دنیا کے وہ پہلے شخص ہیں جو طیارے میں سفر کیے بغیر دنیا کے ہر ملک گھوم چکے ہیں۔

44 سالہ تھورب جورن پیڈرسن کو ایسا کرنے میں 10 سال کا عرصہ لگا، مگر فضائی سفر کے بغیر دنیا گھومنے میں ان کا کتنا خرچہ ہوا؟

اس سوال کا جواب انہوں نے خود ایک انٹرویو میں دیا۔

انہوں نے مجموعی رقم بتانے سے تو گریز کیا مگر ان کا کہنا تھا کہ اوسطاً روزانہ 20 ڈالرز خرچ ہوئے۔

بغیر فضائی سفر کے 10 سال میں پوری دنیا گھومنے والا شخص

پیڈرسن نے مجموعی طور ہر 3 ہزار 576 دن کے سفر میں 37 بحری جہاز تبدیل کیے،158 ٹرینوں میں سفر کیا، 351 بسوں میں بیٹھے، 219 ٹیکسیاں تبدیل کیں، 33 کشتیوں میں سوار ہوئے اور 43 رکشوں میں بیٹھے

یعنی 10 سال کی اوسط کو مدنظر رکھا جائے تو دنیا کے اس سفر میں ان کے 70 سے 75 ہزار ڈالرز خرچ ہوئے ہوں گے۔

خیال رہے کہ ان کا سفر 2013 میں شروع ہوا اور مئی 2023 میں مکمل ہوا۔

انہوں نے بتایا کہ 'کچھ ممالک جیسے سنگاپور میں مجھے روزانہ 20 ڈالرز سے زیادہ خرچ کرنا پڑے، مگر کچھ ممالک جیسے بولیویا میں 20 ڈالرز ضرورت سے زیادہ تھے'۔

انہوں نے بتایا کہ جب وہ ٹرین اور بحری جہاز میں نہیں ہوتے تھے تو زیادہ تر مختلف گھرانوں کے مہمان بن کر ان کے ساتھ رہتے تھے۔

انہوں نے مزید بتایا کہ 10 سال کے دوران لاتعداد افراد نے اپنے گھروں کے دروازے ان کے لیے کھول دیے تھے۔

ان کا کہنا تھا کہ 'درحقیقت اکثر مجھے لوگوں کو انکار کرنا پڑتا تھا کیونکہ مجھے بہت زیادہ افراد کی جانب سے پیشکش کی جاتی تھی یا ان کے ساتھ رہنا میرے لیے مشکل ہوتا تھا'۔

تھورب جورن پیڈرسن کے مطابق متعدد بار انہیں فائیو اسٹار ہوٹلوں میں قیام کی پیشکش بھی ہوئی۔

ایک دہائی طویل ایڈونچر کے دوران انہیں ایک کمپنی روس انرجی کی جانب سے ہر ماہ 600 ڈالرز بھی دیے گئے۔

انہوں نے بتایا کہ 'انہوں نے میرے درد کو محسوس کیا اور وہ میری مدد کرنا چاہتے تھے، میں نے یہ سفر دنیا کی تاریخ کا حصہ بننے کے لیے کیا اور وہ بھی اس کا حصہ بننا چاہتے تھے'۔

دنیا کے 203 خطوں کے سفر کے دوران انہوں نے 3 لاکھ 82 ہزار کلومیٹر کا فاصلہ طے کیا اور اس دوران 20 مختلف اقسام کی ٹرانسپورٹ استعمال کی۔

ان کے اپنے الفاظ میں انہوں نے اس سفر کے دوران 351 بسوں، 67 منی بسوں، 219 ٹیکسیوں، 45 موٹر سائیکل ٹیکسیوں، 84 شیئر ٹیکسیوں، 4 شیئر موٹر سائیکل ٹیکسیوں، 28 فور وہیل ڈرائیو گاڑیوں، 9 ٹرک، 158 ٹرینوں، 19 ٹرامز، 43 رکشوں، 43 کنٹینر بحری جہاز، 33 بوٹس، 32 فیریز، 3 سیل بوٹس، 2 کروز شپ، ایک گھوڑا گاڑی، ایک پولیس کی گاڑی اور ایک ہائی پرفارمنس یاٹ میں سفر کیا۔

انہوں نے اس سفر کے دوران سب سے زیادہ وقت ہانگ کانگ میں گزارا، جہاں وہ کورونا وائرس کی وبا کے باعث 772 دن تک مقیم رہے جبکہ سب سے کم وقت ویٹیکن سٹی میں گزارا جو 24 گھنٹے تھا۔

موت کے منہ میں پہنچنے کا تجربہ

انہوں نے بتایا کہ اس سفر کے دوران پیش آنے والے چند خوفناک واقعات میں سے ایک کیمرون اور کانگو کی سرحد پر پیش آیا۔

ان کے مطابق ٹوٹے پھوٹے راستے پر کئی گھنٹوں کے سفر کے بعد سرحد کے قریب 3 فوجی وردی میں ملبوس افراد نے ان کی ٹیکسی کو روک لیا جو نشے میں دھت نظر آتے تھے۔

انہوں نے مزید بتایا کہ 'گاڑی سے باہر نکلنے پر جب ایک وردی میں ملبوس شخص نے مجھے دیکھا تو میں نے اس کی آنکھوں میں آگ بھڑکتی دیکھی، اس کی آنکھوں میں بہت زیادہ غصہ نظر آیا، وہ مجھے مغربی سامراجی نظام کا ذمہ دار سمجھ رہا تھا'۔

ان کا کہنا تھا کہ 'تینوں افراد کی انگلیاں ٹریگر پر تھیں، مجھے لگ رہا تھا کہ اب میں مرنے والا ہوں اور میرے سفر کا اختتام ہوگیا ہے'۔

مگر 45 منٹ بعد فوجیوں نے اچانک انہیں جانے دیا۔

تھورب جورن پیڈرسن نے کہا کہ 'ہم واپس ٹیکسی میں پہنچے اور وہاں سے 3 کلومیٹر دور چلے گئے، جہاں میں نے ڈرائیو کو رکنے کا کہا اور باہر نکل کر سڑک پر بیٹھ گیا، جہاں میں 10 منٹ تک کانپتا رہا'۔

دیگر افراد کو کیا مشورہ دیا؟

جو کوئی ان کے نقش قدم پر چلنا چاہتا ہے، اس کے بارے میں تھورب جورن پیڈرسن کا مشورہ ہے کہ ایسا مت کریں۔

انہوں نے کہا کہ 'اس سفر نے میری زندگی کا بہت بڑا حصہ چھین لیا اور اس کا خرچہ، بہت، بہت زیادہ تھا، میں نے اسے مکمل کرنے کے لیے بہت زیادہ وسائل خرچ کیے، یہ بہت، بہت زیادہ مشکل تھا'۔

انہوں نے مزید کہا کہ 'کچھ اور ایسا کریں جو زیادہ قابل فہم اور پرلطف ہو'۔