کھیل

ورلڈکپ کا گروپ مرحلہ ختم :کونسی ٹیم سیمی فائنل میں کس ٹیم سے ٹکرائے گی؟

12 نومبر ، 2023

آئی سی سی ون ڈے ورلڈکپ 2023 میں اتوار کو بھارت کی نیدرلینڈز کے خلاف جیت کے بعد گروپ مرحلہ ختم ہوگیا۔

بھارت میں جاری ورلڈکپ کے پہلے مرحلے میں مجموعی طور پر45 میچز کھیلے گئے، ایونٹ میں شریک 10 ٹیموں نے 9،9 میچز کھیلے۔

گروپ مرحلے کے آخر میں ٹاپ چار ٹیمیں، بھارت، جنوبی افریقا، آسٹریلیا اور نیوزی لینڈ نے سیمی فائنل کے لیے کوالیفا ئی کیا۔

بھارت گروپ اسٹیج میں ناقابل شکست رہا، انڈین ٹیم نے اپنے تمام 9 میچز میں کامیابی حاصل کی۔

کونسی ٹیم سیمی فائنل میں کس ٹیم سے ٹکرائے گی؟

گروپ اسٹیج کے اختتام پر پوائنٹس ٹیبل پر بھارت پہلے، جنوبی افریقا دوسرے، آسٹریلیا تیسرے اور نیوزی لینڈ چوتھے نمبر پر ہے۔

ورلڈکپ کے شیڈول کے مطابق پوائنٹس ٹیبل پر پہلے نمبر پر آنے والی ٹیم سیمی فائنل میں چوتھے نمبر کی ٹیم سے مقابلہ کرے گی۔

اسی طرح پوائنٹس ٹیبل کی دوسرے نمبر کی ٹیم تیسرے نمبر پر موجود ٹیم کا سیمی فائنل میں سامنا کرے گی۔

اس حساب سے بھارت کا سیمی فائنل میں نیوزی لینڈ اور آسٹریلیا کا جنوبی افریقا سے مقابلہ ہوگا۔

آئی سی سی ورلڈکپ 2023 کا پہلا سیمی فائنل 15 نومبر کو بھارت اور نیوزی لینڈ کے درمیان ہوگا جبکہ دوسرا سیمی فائنل 16 نومبر کو آسٹریلیا اور جنوبی افریقا کے درمیان کھیلا جائے گا۔

ورلڈکپ کا فائنل 19 نومبر کو ہوگا۔