11 دسمبر ، 2023 
سٹی کونسل میں میونسپل چارجز بجلی کے بلوں میں وصولی کی قرارداد کثرت رائے سے منظور
11 دسمبر ، 2023
سٹی کونسل بلدیہ عظمیٰ کراچی نے میونسپل چارجز بجلی کے بلوں میں وصول کرنے کی قرارداد کثرت رائے سے منظور کرلی۔
اپوزیشن کی مخالفت پر ڈپٹی میئر کراچی نے کہا کہ جماعت اسلامی تعمیری کام کرنا ہی نہیں چاہتی۔ دوسری جانب حافظ نعیم الرحمن نے میئر کراچی کے خلاف عدم اعتماد لانے کا اعلان کردیا ہے۔
میئر کراچی مرتضی وہاب کی زیر صدارت سٹی کونسل کے اجلاس میں میونسپل چارجز بجلی کے بلوں کے ذریعے وصول کرنے کی قرارداد پیش کی گئی تو اپوزیشن ارکان نے اعتراض کیا۔
تحریک انصاف اور استحکام پاکستان پارٹی کے ارکان کے درمیان ہلڑ بازی بھی جاری رہی۔
امیرجماعت اسلامی کراچی حافظ نعیم الرحمان نے میئر کراچی پر شدید تنقید کرتے ہوئے کہا کہ سٹی کونسل کے اجلاس کو چلانے کی پوری کوشش کی لیکن پیپلز پارٹی کے قبضہ میئر کا رویہ قوم کے سامنے ہے، انہیں تحریک عدم اعتماد کے ذریعے گھر بھیجیں گے۔
ڈپٹی میئر کراچی سلمان عبداللہ مراد نے اپنے ردعمل میں کہا کہ جماعت اسلامی عدم اعتماد لے کر آئے، مقابلہ کریں گے۔
ایوان نے بلدیاتی ملازمین کے واجبات کی ادائیگی کیلئے سندھ حکومت سے ساڑھے گیارہ ارب روپے بیل آؤٹ پیکج دینے اور فی یوسی تین کروڑ روپے دینے کی قراردادیں کثرت رائے سے منظور کرلیں جبکہ کے ایم سی کی دکانوں کا کرایہ 75 فیصد بڑھانے کے خلاف اپوزیشن کی قرارداد کثرت رائے سے مسترد کردی۔
اس کے علاوہ سٹی کونسل بلدیہ عظمیٰ کراچی نے میونسپل چارجز بجلی کے بلوں میں وصول کرنے کی قرارداد کثرت رائے سے منظور کرلی۔
