سی ٹی ڈی کے مبینہ مقابلے میں نوجوان کی ہلاکت کیخلاف شرکا کا کوئٹہ میں دھرنا
12 دسمبر ، 2023
تربت میں سی ٹی ڈی کے ہاتھوں مبینہ مقابلے میں ہلاک نوجوان بالاچ کے لواحقین اور بلوچ یکجہتی کمیٹی کے ممبران کا مطالبات کے حق میں کوئٹہ میں سریاب روڈ پر دھرنا دوسرے روز بھی جاری رہا ۔
تربت سے 6 دسمبر کو لانگ مارچ شروع کرنے والے افراد پیر کی شب کوئٹہ پہنچے تھے تاہم کوئٹہ کے ریڈزون میں داخلے کی اجازت نہ ملنے پر لانگ مارچ کے شرکا سریاب روڈ پر گاہی خان چوک کے قریب دھرنا دیے ہوئے ہیں۔
دھرنے میں مبینہ مقابلے میں ہلاک بالاچ مولا بخش کے لواحقین ، بلوچ یکجہتی کمیٹی اور لاپتہ افراد کے اہل خانہ بھی شریک ہیں۔
شرکا کا مطالبہ ہے کہ تربت مبینہ مقابلے میں ہلاک بالاچ کے قتل کی عدالتی تحقیقات کرائی جائے۔
دوسری جانب لانگ مارچ اور دھرنے کے پیش نظر انتظامیہ کی جانب سے شہر میں ریڈ زون کو کنٹینر اور ٹرک کھڑا کر کے بند کیا گیا ہے ، جس کی وجہ سے زرغون روڈ اور اطراف کی سڑکوں پر ٹریفک کی روانی متاثر ہے۔
