مصر میں ساڑھے 4 ہزار سال پرانا مقبرہ دریافت

مصر میں ایک قدیم مقبرہ دریافت کیا گیا ہے جس کے بارے میں خیال کیا جا رہا ہے کہ وہ ساڑھے 4 ہزار سال پرانا ہے۔

مصر اور جاپان کے ماہرین آثار قدیمہ نے سقارہ کے علاقے میں اس مقبرے کو دریافت کیا جس میں متعدد نوادرات بھی موجود تھے۔

مصری وزارت سیاحت کی جانب سے مقبرے کی دریافت کی تصدیق کی گئی ہے۔

مصری وزارت سیاحت کے مطابق مصری اور جاپانی ماہرین کی ٹیم نے مصر کی دوسری بادشاہت کے عہد کا ایک چٹانی مقبرہ دریافت کیا ہے، جس میں متعدد تاریخی نوادرات اور قبریں موجود ہیں۔

اس مقام سے ایک قبر سے ایک انسانی باقیات کے ساتھ رنگین ماسک بھی ملا ہے جبکہ ایک قبر کسی چھوٹے بچے کی ہے۔

ماہرین کا اندازہ ہے کہ یہ مقبرہ 2649 سے 2150 قبل میسح کے درمیان تعمیر ہوا ہوگا۔

وہاں ملنے والے نوادرات میں ایک تابوت بھی شامل ہے جو مصر کی 18 ویں بادشاہت (1550-1295 قبل مسیح) سے تعلق رکھتا ہے۔

وہاں قدیم مصری دیوتاؤں کے 2 مجسمے اور دیگر نوادرات بھی ملے ہیں۔

جاپانی ماہرین نے کہا کہ اس دریافت سے خطے کی تاریخ کے بارے میں اہم تفصیلات جاننے کا موقع ملے گا۔