کاروبار

زیادہ پالیسی ریٹ: قرض و سود کی ادائیگی پر اخراجات میں 74 فیصد اضافہ

25 جنوری ، 2024

اب بڑا چیلنج ادائیگیوں پر بڑھتا ہوا سود ہے جو کہ بلند پالیسی ریٹ( شرح سود ) کی وجہ سے ہیں جنہوں نے موجودہ اخراجات میں بڑا اضافہ کردیا ہے/ فائل فوٹو

اسلام آباد: موجودہ مالی سال کے پہلے 5 ماہ کے دوران پاکستان کا قرض کی ادائیگیوں اور اصل زر کی واپسی پر آنے والا خرچ زیادہ پالیسی ریٹس کی وجہ سے گزشتہ مالی سال 2023 کے دوران اسی مدت میں قرض کی نسبت 74فیصد بڑھ گیا ہے۔

مالی محاذ پر ابھرتا ہوا ایک اور چیلنج یہ ہے کہ صوبوں کی جانب سے پیدا کی جانے والی اضافی آمدنی اسی عرصے کے دوران 107.9ارب پرکھڑی ہے جب کہ گزشتہ مالی سال کے دوران اسی عرصے کے دوران یہ 202.5 ارب روپے تھی۔

اب بڑا چیلنج ادائیگیوں پر بڑھتا ہوا سود ہے جو کہ بلند پالیسی ریٹ( شرح سود ) کی وجہ سے ہیں جنہوں نے موجودہ اخراجات میں بڑا اضافہ کردیا ہے۔

تاہم حکومت سود پر آنے والے اخراجات کو قابو میں لانے کےلیے تمام تر کوششیں کر رہی ہے جو کہ جولائی نومبر 2024کے دوران پرائمری سرپلس میں اضافے سے ظاہر ہوتی ہیں۔

اسٹیٹ بینک آف پاکستان کی مالیاتی پالیسی کمیٹی کا اجلاس آئندہ ہفتے کو شیڈول ہے اور اس میں بلند شرح سود کو غیر مبدل رکھاجائےگا، اگر پالیسی ریٹ بڑھتا ہے تو سود کی ادائیگی پر آنے والے اخراجات آئندہ مہینوں میں مزید رقم کھاجائیں گے اور وزارت خزانہ کےلیے مشکلات بڑھیں گی۔

جولائی سے نومبر 2024کے مالی سال میں مجموعی طور پر 43 فیصد اضافہ ہوا جو کہ 4831 ارب روپے ہے گزشتہ مالی سال کے دوران یہ اخراجات 3367.4 ارب روپے تھا۔