مبینہ انتخابی دھاندلی: کراچی کے مختلف مقامات پر احتجاج، شہر میں ٹریفک کا نظام درہم برہم

کراچی کی مختلف شاہراہوں پر مبینہ انتخابی دھاندلی کے خلاف احتجاج کیا جارہاہے جس کے باعث مختلف مقامات پر ٹریفک جام  ہوگیا۔

کراچی میں شارع فیصل پر نرسری کے مقام پر احتجاج کےباعث نرسری سے ایف ٹی سی تک ٹریفک کی روانی شدید متاثر  ہوئی جب کہ کارساز پر بھی جے یو آئی، جماعت اسلامی اور دیگر جماعتوں کا احتجاج  ہوا۔

پولیس نے مظاہرین کو منتشر کرنے کے لیے ان پر شیلنگ کی جس دوران پولیس اور مظاہرین میں جھڑپیں بھی ہوئیں۔

پولیس کی جانب سے مظاہرین پر لاٹھی چارج اور شیلنگ کے بعد مظاہرین طارق روڈ کی جانب روانہ ہوگئے جس کی وجہ سے مختلف  شاہراہوں پر ٹریفک مزید جام ہوگیا۔

اس کے علاوہ الیکشن میں مبینہ دھاندلی پر مظاہرین نے ٹول پلازہ پر بھی احتجاج کیا جس سے کراچی حیدرآباد موٹر وے پر ٹریفک معطل ہوگئی۔

پروازوں کا شیڈول متاثر

دوسری جانب شارع فیصل پر احتجاج کی وجہ سے مسافروں کو کراچی ائیرپورٹ پہنچنے میں دشواری کا سامناہے جس وجہ سے فلائٹ شیڈول بری طرح متاثر ہوا۔

فلائٹ شیڈول متاثر ہونے سے کراچی سے دبئی، کراچی سے مسقط، کراچی سے لاہور اور  کراچی سے اسلام آبادکی پروازیں تاخیر کا شکار ہوئیں۔

سندھ اسمبلی کے باہر احتجاج کرنیوالے گرفتار

دوسری جانب  پولیس نے سندھ اسمبلی کے باہر احتجاج کرنے والے قومی عوامی تحریک کے کارکنان کو حراست میں لے لیا، قومی عوامی تحریک نے الیکشن میں مبینہ دھاندلی کے خلاف سندھ اسمبلی کے باہر احتجاج کیا جس میں خواتین بھی موجود تھیں۔

انتظامیہ نے سندھ اسمبلی میں نو منتخب ارکان کی تقریب حلف برداری کے باعث سکیورٹی انتظامات سخت کیے تھے اور علاقے میں دفعہ 144 نافذ کی گئی ہے جس کے باعث  دفعہ 144 کی حدود میں کسی احتجاج کی اجازت نہیں۔

پولیس نے احتجاج کرنے والے کارکنان منتشر کرنے کیلئے  لاٹھی چارج بھی کیا اور قومی عوامی تحریک کے 10 کارکنان کو حراست میں لے لیا جن میں خواتین کارکنان بھی شامل ہیں۔

قومی اسمبلی میں اقلیتوں کی نشستوں پر کامیاب ارکان کے نوٹیفکیشن جاری

قومی اسمبلی میں اب تک کی پارٹی پوزیشن کے مطابق ن لیگ 108 سیٹوں کے ساتھ سب سے بڑی پارٹی جبکہ پیپلز پارٹی کی نشستوں کی تعداد 68 ہوگئی۔

آج سندھ اسمبلی میں نئے ارکان کی حلف برداری، پنجاب میں اسپیکر و ڈپٹی اسپیکر کا انتخاب ہوگا

سندھ اسمبلی کا اجلاس آج صبح 11 بجے ہوگا، جی ڈی اے اور دیگر سیاسی جماعتوں کا دھرنے کا اعلان، محکمہ داخلہ نے کراچی ریڈ زون میں دفعہ 144 نافذ کردی