20 اپریل ، 2024 
بلوچستان میں بارشیں رک گئیں لیکن گوادر میں سیلابی صورتحال برقرار، شہری محصور
20 اپریل ، 2024
طاقتور مغربی سسٹم بلوچستان کے شمال مشرقی اور مغربی علاقوں میں تباہی پھیلانے کے بعد کمزور پڑگیا جس کے باعث بارشوں کا سلسلہ تھم گیا ہے۔
پروونشل ڈیزاسٹر مینجمنٹ اتھارٹی ( پی ڈی ایم اے) بلوچستان کے مطابق 12 اپریل سے اب تک بارشوں سے11 اضلاع متاثر ہوئے جبکہ مختلف واقعات میں 15افراد جاں بحق اور 10زخمی ہوئے۔
تاہم اب بتایا جا رہا ہے کہ طاقتور مغربی سسٹم بلوچستان کے شمال مشرقی اور مغربی علاقوں میں تباہی پھیلانے کے بعد کمزور پڑگیا ہےجس کے باعث بارشوں کا سلسلہ تھم گیا۔
گوادر میں 4 روز بعد بھی گھروں اور تعلیمی اداروں سے پانی نہیں نکالا جاسکا جس کے باعث گوادر کے مرادی گاؤں میں اب بھی سیلابی صورتحال برقرار ہے، تباہی کے باعث گاؤں کے متعدد افراد 4 روز سے اونچی جگہ پر محصور ہیں جن میں خواتین اور بچے بھی شامل ہیں۔
متاثرہ افراد کا کہنا ہے کہ ان کے پاس راشن اور کھانے پینے کا سامان ختم ہو چکا ہے، دوسری جانب چمن میں بھی 4 روز سے بجلی، فون اور انٹرنیٹ سروسز معطل ہے۔
مزید برآں وزیراعلیٰ بلوچستان سرفراز بگٹی نے کوئٹہ اربن فلڈنگ کی تحقیقات کے لیے فیکٹ فائنڈنگ کمیٹی قائم کردی ہے۔
