22 اپریل ، 2024 
حافظ حمد اللہ نے مولانا فضل الرحمان کو منانے کا بیان مسترد کردیا
22 اپریل ، 2024
جمعیت علمائے اسلام (ف) کے رہنما حافظ حمد اللہ نے راناثنا اللہ کی جانب سے مولانا فضل الرحمان کو منانے کا بیان مسترد کردیا۔
ایک بیان میں حافظ حمداللہ نے کہا کہ مولانا نے مفاہمت کی سیاست کی لیکن مفاہمت کی بھی ایک حد ہوتی ہے، بات اب منانے سے بہت دور جاچکی ہے، مولانا کو کس مقصد کیلئے منایا جائےگا؟ اقتدارکیلئے، ہمیں اقتدار کی ہوس نہیں، نہ ہم اقتدار کے بھوکے ہیں۔
انہوں نے کہا کہ ہماری شرافت اور مفاہمت سےجو فائدہ اٹھانا تھا، اٹھا لیا، اب دھوکا نہیں دے سکتے، 8 فروری کو ایک ڈراما رچایا گیا۔
حافظ حمد اللہ کا کہنا تھا کہ 8 فروری2024 کے انتخابات میں ایسی دھاندلی ہوئی جوتاریخ میں نہیں ہوئی، کہتے تھے صاف شفاف الیکشن ہوں گےلیکن نہ ہوئے، یہ منتخب اور جمہوری حکومت نہیں۔
واضح رہے کہ مولانا فضل الرحمان سے متعلق رانا ثنا اللہ نے کہا تھا کہ فضل الرحمان کا بہت احترام ہے، وہ اس وقت ہمارےساتھ کھڑے ہوئے جب ہم مشکل میں تھے، ان کے ساتھ بیٹھ کربات کرینگے، ان کی بات سمجھنےکی کوشش کرینگے، ہمیں کسی کو 10 بار بھی مناناپڑا تو جائیں گے۔
