22 اپریل ، 2024 
ججز خط کا معاملہ، اسلام آباد ہائیکورٹ کے چیف جسٹس نے کل فل کورٹ میٹنگ بلالی
22 اپریل ، 2024
اسلام آباد ہائیکورٹ کے چیف جسٹس عامر فاروق نے عدالتی امور میں مداخلت پر 6 ججز کے سپریم جوڈیشل کونسل کو خط کے معاملے پر کل فل کورٹ میٹنگ بلالی۔
اسلام آباد ہائیکورٹ کے سینیئر ترین جج جسٹس محسن اختر کیانی، جسٹس طارق محمود جہانگیری، جسٹس بابر ستار، جسٹس سردار اعجاز اسحاق خان، جسٹس ارباب محمد طاہر اور جسٹس ثمن رفعت امتیاز نے سپریم جوڈیشل کونسل کو لکھا تھا۔
سپریم کورٹ نے اس معاملے کا از خود نوٹس لے کر اپنے حکم میں تمام ہائیکورٹ ججز سے اس معاملے پر تجاویز مانگی تھیں۔
سپریم کورٹ کے احکامات کی روشنی میں چیف جسٹس آفس نے تمام ججز سے تجاویز طلب کی تھیں جبکہ اسلام آباد کے ڈسٹرکٹ اینڈ سیشن ججز ایسٹ اور ویسٹ کو بھی تجاویز جمع کرانے کی ہدایت کی گئی تھی۔
تمام ججز کی جانب سے اس معاملے پر تجاویز جمع ہونے کے بعد اسلام آباد ہائیکورٹ کے چیف جسٹس عامر فاروق نے کل 23 اپریل کو فل کورٹ اجلاس بلایا ہے۔ فل کورٹ میٹنگ میں اس معاملے کو زیر بحث لایا جائے گا۔
