24 اپریل ، 2024 
کراچی میں ٹریفک کی روانی برقرار رکھنے کیلئے انسداد تجاوزات آپریشن کا فیصلہ
24 اپریل ، 2024
میئر کراچی مرتضیٰ وہاب نے شہر میں ٹریفک کی روانی برقرار رکھنے کے لیے اہم اقدامات اٹھانے کا فیصلہ کیا ہے۔
میئر کراچی مرتضیٰ وہاب کے مطابق شہر میں ٹریفک کی روانی برقراررکھنے کیلئے ہفتہ وار انسداد تجاوزات آپریشن کرنے کا فیصلہ کیا گیا ہے۔
میئر کراچی کا کہنا ہے کہ بلدیہ عظمیٰ ہفتہ وار انسداد تجاوزات آپریشن کرے گی اور آپریشن کا آغاز صدر، لائٹ ہاؤس، ایم اےجناح روڈ، بولٹن مارکیٹ سے ہوگا جب کہ آئی آئی چندریگر روڈ، نمائش، ایمپریس مارکیٹ اور کھارادرمیں بھی آپریشن ہوگا۔
انہوں نے کہا کہ سڑک پرکیبن، ٹھیلے، پتھارے اوردکانوں کے باہر سامان ہٹایا جائے گا، شہر میں بلا امتیاز انسدادِ تجاوزات کارروائیاں پورے ہفتے جاری رہیں گی۔
مئیرکراچی کے مطابق پہلے ساؤتھ، ضلع شرقی اورپھر ضلع وسطی میں کارروائی کی جائےگی جس کی نگرانی سینئر ڈائریکٹر عمران راجپوت کریں گے۔
