03 مئی ، 2024 
پیپلز پارٹی نے سردار سلیم حیدر کو پنجاب، فیصل کریم کنڈی کو خیبر پختونخوا کا گورنر نامزد کر دیا
03 مئی ، 2024
چیئرمین پیپلزپارٹی بلاول بھٹوزرداری نے سردار سلیم حیدر کو گورنر پنجاب جبکہ فیصل کریم کنڈی کو گورنر خیبر پختونخوا نامزد کر دیا۔
چیئرمین پاکستان پیپلز پارٹی بلاول بھٹو زرداری کا کہنا ہے کہ وہ پراعتماد ہیں کہ یہ دونوں رہنما اپنےفرائض بخوبی سرانجام دیں گے۔
فیصل کریم کنڈی کا تعلق ڈیرہ اسماعیل خان سے ہے، وہ پاکستان پیپلزپارٹی کے سیکریٹری اطلاعات اور 2008 سے 2013 تک ڈپٹی اسپیکر قومی اسمبلی رہے ہیں۔
سردار سلیم حیدر کا تعلق ضلع اٹک سے ہے اور وہ سابق وفاقی وزیر بھی رہے ہیں۔ اس کے علاوہ وہ پیپلزپارٹی راولپنڈی ڈویژن کے صدر بھی ہیں۔
سردارسلیم حیدرخان معاون خصوصی برائے اوورسیز پاکستانیز بھی رہ چکے ہیں، وہ وزیر مملکت برائے دفاع اور دفاعی پیدوار بھی رہ چکے ہیں۔
وہ 2008 میں اٹک سے این اے 59 سے ایم این اے منتخب ہوئے۔
سردارسلیم حیدر نےجیونیوز سے گفتگو میں کہا ہے کہ چیئرمین پیپلزپارٹی نے مجھے خوشخبری سنائی ہے کہ آپ ہمارے گورنر پنجاب ہوں گے، بتایا گیا ہے کہ آج رات تک نوٹیفکیشن جاری ہوجائے گا۔
