20 جون ، 2024 
سِمز بند نہ کرنے پر 20 کروڑ تک جرمانہ ہوسکتا ہے، ٹیلی کام کمپنیوں کی سینیٹ کمیٹی میں دہائی
20 جون ، 2024
ٹیلی کام کمپنیوں نے سینیٹ کی قائمہ کمیٹی برائے خزانہ میں دہائی دیتے ہوئے کہا ہے کہ اگر وہ نان فائلرز کی سِمز بند کرنے میں ناکام ہوں تو انہیں 10 سے 20 کروڑ روپے جرمانہ کیا جاسکتا ہے۔
ٹیلی کام کمپنیوں کے نمائندوں نے بتایا کہ حکومت نے اپنا کام ٹیلی کام کمپنیوں پر لاد دیا ہے، کمپنیوں کا یہ کام نہیں ہے اور نہ مشورہ کیا گیا۔
کمپنیوں کا مؤقف تھا کہ یہ غیر قانونی کام اور غیر قانونی جرمانہ ہے، کمپنیاں قانون نافذ کرنے والا ادارہ نہیں مگر ان سے وہ کام کروایا جارہا ہے۔
سینیٹر محسن عزیز نے کہا کہ کمپنیوں کے نمائندوں کی بات میں بہت وزن ہے، ان کا مسئلہ حل کیا جائے، فاروق نائیک نے سوال کیا کہ اگر کوئی نان فائلر ہے تو موبائل کمپنیاں کس طرح اس کا ٹیکس وصول کرسکتی ہیں؟
چیئرمین ایف بی آر نے بتایا کہ صرف شناخت شدہ 24 لاکھ نان فائلرز میں سے 5 لاکھ کی سمیں بند کرنے کا کہا ہے۔
ان کا کہنا تھا کہ تمام ودہولڈنگ ٹیکس وصول کرنے والوں کی طرح ان کمپنیوں کو بھی کام کرنا ہے، اس کی منظوری پارلیمنٹ نے 2022 کے فنانس بل میں دی تھی، کمپنیوں کو 15 دن کے اندر ان احکامات پر عمل درآمد کرنا ہوگا۔
