’ہتک عزت قانون میں میڈیا کا احترام ہے لیکن وہ جھوٹ بولیں اور پکڑے نہ جائیں، یہ نہیں ہوگا‘

لاہور : وزیراعلیٰ پنجاب مریم نواز نے کہا ہے کہ پنجاب اسمبلی کے پاس کیے گئے ہتک عزت قانون میں میڈیا کا بہت احترام ہے  لیکن میڈیا بولے کہ ہم جھوٹ بولیں اور پکڑے نہ جائیں، یہ نہیں ہوگا۔

لاہور میں اتحاد بین المسلمین کانفرنس سے خطاب کے دوران مریم نواز نے سوات واقعے کا تذکرہ کرتے ہوئے کہا کہ آج کل مذہب کی بے حرمتی کی بہت شکایات سامنے آرہی ہیں،  بڑھتے واقعات کی وجوہات کو دیکھنا ہوگا۔

انہوں نے کہا کہ کسی کو قانون ہاتھ میں لینے کی اجازت نہیں دی جاسکتی،جب کوئی جرم ثابت ہوتاہے تو مجرم کو قانون کےحوالے کرنا چاہیے لہٰذا قانون کو اپنے ہاتھ میں لینے کی اور اپنی عدالت گلی محلوں میں لگانےکی اجازت قطعاً نہیں دینی چاہیے،  جو مذہب کو رسوا کرنے کا باعث بنتا ہے وہ سب سےبڑا مجرم ہے۔

ہتک عزت قانون سے متعلق مریم نواز کا کہنا تھا کہ  پنجاب اسمبلی کے پاس کیے گئے ہتک عزت قانون  میں میڈیا کا بہت احترام ہے لیکن کسی کی پگڑی اچھالنے، تہمت لگانے کی بغیر ثبوت اجازت نہیں دی جا سکتی، میڈیا بولے کہ ہم جھوٹ بولیں اور پکڑے نہ جائیں، یہ نہیں ہوگا۔

وزیراعلیٰ پنجاب نے مزید کہا کہ جو الزام لگایا اس کا ثبوت مہیا کردیں تو بات ختم ہو جائے گی، اگر بدنیتی سے الزام لگایا، جھوٹ بولا تو اس کی سزا ملے گی، ہر مہذب معاشرے میں یہ قانون ہے، صرف زبان ہلا کر کسی کی عزت کو آپ داغ دار نہیں کرسکتے۔