14 اگست ، 2024 
سندھ کے اسکولوں میں موسم گرما کی تعطیلات کے بعد آج سے تدریسی عمل شروع ہوگا
14 اگست ، 2024
کراچی: موسم گرما کی تعطیلات کے بعد سندھ بھر میں آج سے اسکولوں میں تدریسی عمل شروع ہوجائےگا۔
محکمہ تعلیم سندھ کے مطابق نجی اسکولز بھی معمول کے مطابق تدریسی عمل شروع کریں گے۔
محکمہ تعلیم سندھ نے نئے تعلیمی سال کے سلسلے میں ضروری قدامات مکمل کرلیے ہیں۔
وزیر تعلیم سندھ سید سردار شاہ کا کہنا ہے کہ طلبہ کوپہلے سے زیادہ توجہ و عزم سے تعلیم حاصل کرنےکی تلقین کرتا ہوں۔
وزیر تعلیم نے کہا کہ اساتذہ اپنی ذمہ داریاں ایمانداری کے ساتھ ادا کریں، اساتذہ کی میرٹ پربھرتیوں سے صوبے میں تعلیمی نظام میں بہتری آئی ہے۔
ان کا کہنا تھا کہ ملک میں پہلی بار سندھ میں اساتذہ لائسنس پالیسی و دیگر اصلاحات متعارف کرائیں، صوبے میں تعلیمی اصلاحات کے سلسلے کو جاری رکھا جائےگا۔
خیال رہے کہ اس سے قبل سندھ میں موسم گرما کی تعطیلات کے بعد یکم اگست سے اسکول دوبارہ کھلنے تھے تاہم محکمہ تعلیم سندھ نے گرمی کی شدت اور برسات کے امکان کے باعث موسم گرما کی تعطیلات 14 اگست تک بڑھانے کا اعلان کیا تھا۔
