29 اگست ، 2024 
آئی پی ایل ٹیم کی روہت شرما کو 50 کروڑ بھارتی روپے کی پیشکش کی خبریں زیر گردش
29 اگست ، 2024
انڈین پریمیئر لیگ کی ٹیم لکھنو سپر جائنٹس نے بھارتی ٹیم کے کپتان اور جارح مزاج اوپنر روہت شرما کو 50 کروڑ بھارتی روپے کی کھلی پیشکش کر ڈالی۔
بھارتی میڈیا کے مطابق آئی پی ایل 2025 کے آکشن بہت بڑے ہوں گے اور عام طور پر جب آئی پی ایل میں میگا آکشن ہوتی ہے تو پوری ٹیم ہی تبدیل ہو جاتی ہے۔
میڈیا رپورٹس کے مطابق اس بار بھی آکشن کے لیے سب کی نظریں ممبئی انڈینز پر ہیں جس میں بھارتی ٹی ٹوئنٹی ٹیم کے کپتان سوریا کمار یادیو اور ٹی ٹوئنٹی ورلڈکپ کے فاتح کپتان روہت شرما، اسٹار آل راؤنڈر ہادرک پانڈیا اور فاسٹ جسپریت بھمرا شامل ہیں، دیکھنا یہ ہے کہ کیا ممبئی انڈینز اپنے تمام سپر اسٹار کھلاڑیوں کو دوبارہ رکھنے میں کامیاب ہوتی یا نہیں۔
اس تمام تر صورتحال میں یہ خبریں بھی زیر گردش ہیں کہ لکھنو سپر جائنٹس کے مالک سنجیو گوئنکا نے روہت شرما کو اپنی ٹیم کے لیے کھیلنے کے عوض 50 کروڑ بھارتی روپے کی پیشکش کی ہے۔
بھارتی چینل اسپورٹس تک کے صحافی کی جانب سے جب ان زیر گردش افواہوں سے متعلق لکھنو سپر جائنٹس کے مالک سے پوچھا گیا تو انہوں نے سیدھا جواب دینے سے گریز کرتے ہوئے کہا کہ ہر کسی کی خواہش ہوتی ہے کہ اچھا کھلاڑی ان کے پاس ہو، ان کی ٹیم کا کپتان بہترین ہو، یہ خواہش پر نہیں ہوتا بلکہ آپ کو دستیابی دیکھ کر کھلاڑیوں کو حاصل کرنا ہوتا ہے۔
سنجیو گوئنکا کا اپنی بات جاری رکھتے ہوئے کہنا تھا میں اس کھلاڑی کو کیسے استعمال کرتا ہوں یہ زیادہ اہم ہوتا ہے، میں کسی بھی کھلاڑی کی خواہش کا اظہار کر سکتا ہوں لیکن یہ ہر فرنچائز کے لیے ہے اور آپ ہر کھلاڑی کو حاصل نہیں کر سکتے۔
