کاروبار

رواں مالی سال کے پہلے 4 ماہ میں تجارتی خسارے میں کمی ریکارڈ

02 نومبر ، 2024

رواں مالی سال کے پہلے 4 ماہ میں تجارتی خسارے میں کمی ریکارڈ — فوٹو: فائل

ادارہ شماریات کا کہنا ہے کہ رواں مالی سال کے پہلے 4 ماہ میں تجارتی خسارے میں 5.19 فیصد کمی ریکارڈ کی گئی۔

ادارہ شماریات کی جانب سے جاری اعداد و شمار مطابق رواں مالی سال کے پہلے 4 ماہ کے دوران 10 ارب 88 کروڑ ڈالر کے حجم کے ساتھ برآمدات میں 13.45 فیصد اضافہ ریکارڈ ہوا، گزشتہ مالی سال کے پہلے 4 ماہ میں برآمدات کا حجم 9 ارب 59 کروڑ ڈالر تھا۔

ادارہ شماریات کے مطابق اکتوبر میں برآمدات 10.64 فیصد کے اضافے سے 2 ارب 97 کروڑ ڈالر رہیں جبکہ گزشتہ سال اکتوبر میں برآمدات کا حجم 2 ارب 69 کروڑ ڈالر تھا۔

اعداد و شمار کے مطابق ستمبر کی نسبت اکتوبر میں برآمدات میں 4.90 فیصد اضافہ ہوا، ستمبر میں برآمدات کا حجم 2 ارب 83 کروڑ 60 لاکھ ڈالر تھا۔

ادارہ شماریات کے جاری اعداد و شمار کے مطابق رواں مالی سال کے پہلے 4 ماہ کے دوران مجموعی درآمدات 5.17 فیصد اضافے سے 17 ارب 85 کروڑ ڈالر رہیں، گزشتہ مالی سال کے اسی عرصے کے دوران درآمدات کا حجم 16 ارب 98 کروڑ ڈالر تھا۔

ادارہ شماریات کا کہنا تھا کہ اکتوبر میں سالانہ بنیادوں پر درآمدات 8.02 فیصد کمی سے 4 ارب 47 کروڑ ڈالر رہیں جبکہ گزشتہ سال اکتوبر میں درآمدات کا حجم 4 ارب 86 کروڑ ڈالر تھا۔

ادارہ شماریات کے مطابق ستمبر کے مقابلے میں اکتوبر کے دوران درآمدات میں 3.93 فیصد کمی ریکارڈ کی گئی۔