13 نومبر ، 2024 
ضلع کیچ میں سکیورٹی فورسز کی کارروائی، فائرنگ کے تبادلے میں 4 دہشتگرد ہلاک
13 نومبر ، 2024
بلوچستان کے ضلع کیچ میں سکیورٹی فورسز کی کارروائی کے دوران فائرنگ کے تبادلے میں 4 دہشت گرد ہلاک ہوگئے۔
پاک فوج کے شعبہ تعلقات عامہ (آئی ایس پی آر) کے مطابق 12 اور 13 نومبر کی رات سکیورٹی فورسز نے خفیہ معلومات کی بنیاد پر آپریشن کیا۔
آئی ایس پی آر نے بتایا کہ آپریشن ضلع کیچ کے علاقے بلگتارمیں دہشت گردوں کی موجودگی کی اطلاع پر کیا گیا، آپریشن کے دوران سکیورٹی فورسز اور دہشت گردوں کے درمیان شدید فائرنگ کا تبادلہ ہواجس میں 4 دہشت گرد مارے گئے۔
آئی ایس پی آر کے مطابق ہلاک دہشت گردوں میں انتہائی مطلوب دہشت گرد اور گینگ کا سرغنہ ثناعرف باروبھی شامل ہے۔
آئی ایس پی آر کا کہنا ہے کہ دہشت گرد ثنا عرف بارو ضلع کیچ میں نام نہاد مجید بریگیڈ کیلئے بھرتیاں کرتا تھا، وہ خودکش بمباروں کا مرکزی ایجنٹ اور قانون نافذ کرنے والے اداروں کو انتہائی مطلوب تھا۔
