25 نومبر ، 2024 
لاہور سمیت 4 اضلاع میں تعمیراتی کام کرنے اور دفاتر کو مکمل عملہ بلانے کی اجازت مل گئی
25 نومبر ، 2024
لاہور: اسموگ کی صورتحال میں بہتری کے بعد پنجاب حکومت نے لاہور سمیت 4 اضلاع میں تعمیراتی کام کی اجازت دےدی۔
ڈی جی ماحولیات ڈاکٹر عمران حامد شیخ کی جانب سے جاری نوٹیفکیشن کے مطابق لاہور، گوجرانوالہ، ملتان اور فیصل آباد میں تعمیراتی کام کی اجازت ہوگی جب کہ زگ زیگ ٹیکنالوجی پربھٹے بھی کام کرسکیں گے۔
نوٹیفکیشن کے مطابق ہیوی ٹریفک پیر سے جمعرات تک اضلاع میں داخل ہوسکےگی جب کہ جمعہ سے اتوار تک ہیوی ٹریفک کو داخلےکی اجازت نہیں ہوگی۔
نوٹیفکیشن میں کہا گیا ہےکہ سرکاری و نجی دفاترکو 100 فیصد عملےکے ساتھ کام کرنےکی اجازت ہوگی، دکانیں، مارکیٹس اور شاپنگ مالز 8 بجے بند کرنےکا فیصلہ برقرار رکھا گیا ہے جب کہ ریسٹورینٹس کی ان ڈور اور آوٹ ڈور ڈائننگ 10 بجے تک ہوگی۔
واضح رہے کہ پنجاب حکومت نے خطرناک حد تک بڑھتی اسموگ کے باعث صوبے میں مختلف قسم کی پابندیاں عائد کی تھیں جن میں اب نرمی کردی گئی ہے۔
