19 دسمبر ، 2024 
ایمنڈ نے پاکستان میں میڈیا کی آزادی کی صورتحال تشویشناک قرار دے دی
19 دسمبر ، 2024
ایسوسی ایشن آف الیکٹرانک میڈیا ایڈیٹرز اینڈ نیوز ڈائریکٹرز (ایمنڈ) نے پاکستان میں میڈیا کی آزادی کی صورتحال تشویشناک قرار دے دی۔
ایمنڈ کی جانب سے جاری ایک بیان میں کہا گیا ہےکہ ادارتی پالیسیوں کی ناپسندیدگی کے باعث بعض میڈیا اداروں کے اشتہارات بند کرکے اُنہیں کاروباری نقصان پہنچانےکا سلسلہ شروع ہوگیا ہے جس سے میڈیا کے ادارے اور صحافی براہ راست متاثر ہوں گے۔
ایمنڈ کا کہنا ہے کہ پیمرا ربر اسٹیمپ کے طور پر کام کر رہا ہے جو ٹی وی چیلنز کو دباؤ میں لانےکے لیے ہر روز غیر قانونی نوٹسز جاری کر رہا ہے۔
ایمنڈ نے صحافیوں کے خلاف مقدمات اور انٹرنیٹ بندش پر بھی تشویش کا اظہارکیا ہے اور کہا ہےکہ اخلاقی اور قانونی پابندیوں کی آڑ میں صحافیوں کے خلاف نوٹسز جاری کرنے اور مقدمات قائم کرنےکا سلسلہ جاری ہے جب کہ انٹرنیٹ سروسز کی بندش، تعطل اور سوشل میڈیا ایپس میں خلل سے صحافی اور میڈیا کے ادارے براہ راست متاثر ہو رہے ہیں۔
ایمنڈ نے وزیر اعظم شہباز شریف اور بلاول بھٹو زرداری سمیت سیاسی قائدین سے مطالبہ کیا ہےکہ ملک میں آزادی اظہار رائے پر پابندیوں کی صورت حال کا سنجیدگی سے جائزہ لیں۔
