05 فروری ، 2025 
کراچی میں آج مختلف ٹریفک حادثات میں 6 شہری جان سےگئے
05 فروری ، 2025
کراچی میں آج مختلف ٹریفک حادثات میں 6 افراد جاں بحق ہوگئے۔
کراچی کا بے لگام ٹریفک شہریوں کی جان کا دشمن بن گیا ہے،کہیں ٹریلر،کہیں ٹرک، کہیں ڈمپر تو کہیں بس، روزانہ کسی نہ کسی کو کچل کر ہلاک یا زخمی کررہے ہیں۔
آج بھی مختلف حادثات میں 6 شہری جان سے گئے۔ پہلا حادثہ گلستان جوہر ملینیئم مال کے قریب ہوا جہاں تیز رفتار ڈمپر 2 موٹر سائیکلوں پر چڑھ دوڑا۔ نتیجے میں میاں بیوی سمیت 3 افراد جاں بحق اور 2 زخمی ہوگئے۔ ہلاک افراد کی شناخت مریم، کامران اور فاروق کے ناموں سے ہوئی ہے۔ ڈمپر حادثےکا ذمہ دار ڈرائیور فرار ہوگیا۔
دوسرا حادثہ ملیر کھوکھرا پار میں پیش آیا جہاں خراب بس کو اسٹارٹ کرنے کے لیے دھکا لگایا جارہا تھا۔ بس اسٹارٹ ہوئی تو ڈرائیور نے ایکسیلریٹر پر پورا دباؤ ڈالا ہوا تھا، نتیجے میں بس بے قابو ہوکر قریب کی گلی میں گھس گئی، یہاں پاس سے گزرنے والا موٹر سائیکل سوار تو بچ گیا مگر گلی میں موجود خاتون اور اس کا کمسن بیٹا بس کے نیچے آکر جاں بحق ہوگئے جب کہ 3 افراد زخمی ہوئے۔ بس ڈرائیور کو پولیس نے گرفتار کرلیا ہے۔
تیسرا حادثہ گلشن معمار میں پیش آیا جہاں گاڑی کی ٹکر سے موٹرسائیکل سوار جاں بحق اور 3 بچے زخمی ہوگئے۔
ریسکیو اداروں کےمطابق کراچی میں رواں سال مختلف ٹریفک حادثات میں 69 افراد جاں بحق اور 1043 زخمی ہوچکے ہیں۔
