08 فروری ، 2025 
آپ کو نکال دیا گیا ہے، ٹرمپ نے سابق صدر جو بائیڈن کی خفیہ معلومات تک رسائی روک دی
08 فروری ، 2025
امریکا کے صدر ڈونلڈ ٹرمپ نے سابق صدر جو بائیڈن کی خفیہ معلومات تک رسائی روک دی۔
ڈونلڈ ٹرمپ نے سوشل میڈیا پر جاری بیان میں لکھا کہ جو بائیڈن کو خفیہ معلومات تک رسائی کی ضرورت نہیں ہے، ہم جو بائیڈن کی سکیورٹی کلیئرنس اور انہیں روزانہ کی بنیاد پر دی جانے والی انٹیلی جنس بریفنگ فوری طور پر روک رہے ہیں۔
امریکی صدر نے لکھا کہ انہوں (جو بائیڈن) نے یہ روایت 2021 میں ڈالی تھی جب انہوں نے انٹیلی جنس کمیونٹی سے یہ کہا تھا کہ امریکا کے 45 ویں صدر (ڈونلڈ ٹرمپ) کو قومی سلامتی سے متعلق معلومات تک رسائی روک دی جائیں۔
ڈونلڈ ٹرمپ نے لکھا کہ ایک رپورٹ میں انکشاف ہوا ہے کہ جو بائیڈن کو بھولنے کی بیماری لاحق ہے، حتیٰ کے ان کے دور صدارت میں بھی حساس معلومات شیئر کرنے کے حوالے سے ان پر بھروسہ نہیں کیا جا سکتا تھا، میں قومی سلامتی کی ہمیشہ حفاظت کروں گا، جو بائیڈن آپ کو نکال دیا گیا ہے۔
