ٹاسک فورس نے پراپرٹی سیکٹرکی بات نہیں کی، توجہ پلاٹوں کی خریداری بڑھانے پر نہیں: عارف حبیب

معروف صنعت کار عارف حبیب نے کہا کہ ٹاسک فورس نے پراپرٹی سیکٹر نہیں بلکہ تعمیرات کے شعبے میں معاشی نمو تیز کرنے پر بات کی ہے۔

پاکستانی میڈیا کی تاریخ میں پہلی بار فیڈرل بورڈ آف ریونیو (ایف بی آر) کے چیئرمین راشد محمود لنگڑیال نے ملک کی معروف ترین کاروباری شخصیات اور ماہرین کے سوالوں کے جوابات جیو نیوز کی خصوصی ٹرانسمیشن میں دیے۔

جیو نیوز کی ’پاکستان کے لیے اس بار کر ڈالو‘ خصوصی ٹرانسمیشن میں گفتگو کرتے ہوئے معروف صنعت کار عارف حبیب نے کہا کہ ٹاسک فورس نے پراپرٹی سیکٹر نہیں، بلکہ تعمیرات کے شعبے میں معاشی نمو تیز کرنے پر بات کی ہے، ہماری توجہ پلاٹوں کی خریداری بڑھانے پر نہیں۔

ان کا کہنا تھاکہ انڈسٹری سے زیادہ تعمیرات پر ٹیکس ہے جو 115 فیصد ہے، گھروں کی فروخت کیش میں کرنے سے چیزیں دستاویزی نہیں رہتیں، اس سے حکومت ٹیکسوں کی وصولی بھی نہیں کرسکتی۔

ہمارے ٹیکسیشن اسٹرکچرمیں بہتری کی ضرورت ہے: چیئرمین ایف بی آرکا جیو کی خصوصی ٹرانسمیشن میں اظہارخیال

ہمارا مسئلہ یہ ہےکہ جن لوگوں کوٹیکس ادا کرناچاہیے وہ نہیں کر رہے، ہم نے ایف بی آر میں یہ صلاحیت پیدا نہیں کی کہ ان سےٹیکس وصول کرے: راشد لنگڑیال

انہوں نے تجویز دی کہ جوپرانی غلطیوں کی تلافی کرکے شفاف طریقے سے آگے بڑھناچاہتے ہیں ان کی حوصلہ افزائی ہونی چاہیے۔

ان کا کہنا تھاکہ ٹیکس میں کمی کی بات ایڈوانس ٹیکس کلیکشن سے متعلق ہورہی ہے، جتنا ٹیکس ہے وہ تو دینا ہی پڑےگا، تجویزپیشگی ادائیگی میں کمی کی ہے۔

پاکستان بزنس کونسل کے سی ای او احسان ملک نے کہا کہ اگر زیادہ معاشی نمو برقرار رکھنی ہے تو اس کا طریقہ برآمدات میں اضافہ ہی ہے، ملک میں سرمایہ کاری بڑھانے کے لیے اچھی مالیاتی پالیسی کی ضرورت ہے۔ 

خصوصی ٹرانسمیشن میں گفتگو کرتے ہوئے معروف صنعت کار محمد علی ٹبا نے کہا کہ صنعتی شعبے پر مہنگی بجلی، اضافی ٹیکس اور ملکی صورت حال کا بوجھ ہے، حل یہ ہے کہ توانائی کا شعبہ ڈی ریگولیٹ کیا جائے اور بجلی کی تقسیم کار کمپنیوں کو بیچ دیا جائے۔