27 فروری ، 2025 
نواز شریف کا نظریہ اور پروگرام ہی پاکستانی عوام کو مسائل سے نجات دلواسکتا ہے: زاہد خان
27 فروری ، 2025
لاہور میں مسلم لیگ ن خیبرپختونخوا کےصوبائی عہدیداروں نے صدر مسلم لیگ ن نواز شریف سے ملاقات کی۔
اس موقع پر ن لیگ میں شامل ہونے والے سابق سینیٹر اور اے این پی کے سابق رہنما زاہد خان بھی موجود تھے۔
زاہد خان نے نواز شریف کی قیادت پراعتماد کا اظہار کیا اور بھرپورسیاسی کردار ادا کرنے کاعزم کیا۔
زاہد خان کا کہنا تھا کہ مسلم لیگ ن اور نواز شریف کا نظریہ اور پروگرام ہی پاکستان کے عوام کو مسائل سے نجات دلواسکتا ہے، نواز شریف نے ملک کے لیے ترقیاتی منصوبے شروع کیے جن کی بدولت عوام کو فائدہ پہنچا۔
زاہد خان نے مزید کہا کہ لواری ٹنل جیسے منصوبے کو مکمل کروا کر نواز شریف نے چترال کے عوام کے لیے بہترین سہولت فراہم کی، خیبرپختونخوا کے عوام وزیراعلیٰ پنجاب مریم نواز کی کارگردگی کو سراہتے ہیں۔
نواز شریف نے زاہد خان کی مسلم لیگ ن میں شمولیت کا خیر مقدم کرتے ہوئے کہا کہ زاہد خان منجھے ہوئے سیاسی کارکن ہیں، ان کی شمولیت سے ن لیگ کی طاقت میں اضافہ ہوگا۔
نواز شریف کا کہنا تھا کہ خیبرپختونخوا کے عوام نےتحریک پاکستان اور دہشت گردوں کے خلاف بڑی قربانیاں دی ہیں، پاکستانی عوام کی خوشحالی، ملک کو ترقی یافتہ ممالک کی صف میں کھڑا کرنا ن لیگ کا ایجنڈا ہے، جب بھی ملک ترقی کی راہ پر گامزن ہوا اسے سیاسی بحرانوں میں دھکیلا گیا، مسلم لیگ ن کی حکومت نے ایک بار پھر ملک کو بحرانوں سے نکالنے کا بیڑا اٹھایا ہے، ہم نے اللہ تعالی کی مدد سے پاکستان کی معیشت کو بحالی کے راستے پر ڈالا ہے۔
مزید خبریں :
پاکستان میں 2024 میں جمہوریت تنزلی کا شکار رہی
9 گھنٹے پہلے
سندھ کابینہ نے کراچی کیلئے ڈبل ڈیکر بسوں کی منظوری دیدی
10 گھنٹے پہلے
