اسلام آباد… سابق وزیراعظم بینظیر بھٹو کے قتل کیس میں سانحہ 27 دسمبر 2008ء کے 3متاثرہ خاندانوں نے فریق بننے کی درخواست دے دی ہے۔ ٹرائل کورٹ کو بتایاگیاہے کہ اشتہاری ملزم پرویزمشرف کا منجمد بنک اکاوٴنٹ، لندن میں رجسٹرڈ فاوٴنڈیشن کے نام پر کھولا گیا اور اکاوٴنٹ پر اختیار بدل بھی دیا گیا ہے ۔ راول پنڈی میں انسداد دہشت گردی کی خصوصی عدالت نے سابق صدر جنرل ریٹائرڈ پرویزمشرف کے جائیداد ضبطگی کے خلاف انکی اہلیہ صہبا مشرف کی درخواست پر سماعت کی، ایف آئی اے کے وکیل نے عدالت کو بتایاکہ بنک اکاوٴنٹ ، لندن میں رجسٹرڈ پرویزمشرف فاوٴنڈیشن کا ہے، پہلے اس اکاوٴنٹ کو راشدقریشی،محمدعلی سیف اور محمد امجد آپریٹ کرتے تھے، پھربنک حکام کو ایک خط لکھ کر اکاوٴنٹ پر اختیار پرویزمشرف اور عارف انور کو دے دیا گیا ہے، جج نے لندن میں رجسٹرڈ کسی تنظیم کا پاکستان میں اکاوٴنٹ کھولنے کے جواز پر بنک کے وکیل سے جواب طلب کرتے ہوئے سماعت 17 مارچ تک ملتوی کردی، بینظیربھٹو پر حملے کے واقعہ میں جاں بحق ہونے والے دو افراد راجا حبیب اور راجا امین کے بیواوٴں اور جاں بحق جلیل احمد کے والد اکبر نے قتل کیس کے زیر سماعت مقدمہ میں فریق بننے کی درخواست دے دی ہے، ایک بیوہ شگفتہ کے وکیل راجا یاسر نے بتایاکہ عدالت نے اس درخواست کو منظور بھی کرلیا ہے۔