لندن…متحدہ قومی موومنٹ کے قائدالطاف حسین نے عوام سے پرزور اپیل کی ہے کہ وہ عیدالاضحی کے موقع پر قربانی کی کھالیں خدمت خلق فاوٴنڈیشن کودیں۔اپنے ایک بیان میں انہوں نے کہاکہ خدمت خلق فاوٴنڈیشن ایک ممتازفلاحی ادارہ ہے جس نے آزادکشمیر اور خیبر پختونخوامیں قیامت خیززلزلہ ہو،تھراوربلوچستان میں قحط ہویاسندھ،پنجاب میں سیلاب ہویاکوئی بھی قدرتی آفت یاسانحہ ہو،خدمت خلق فاوٴنڈیشن نے ہرموقع پر مصیبت زدگان کی ہرممکن مدد کی ۔ اس کے علاوہ خدمت خلق فاوٴنڈیشن کی جانب سے غریب ومستحقین کی بلاامتیاز امداد کاسلسلہ بھی پورے سال جاری رہتاہے۔ خدمت خلق فاوٴنڈیشن کے زیراہتمام کراچی میں نذیرحسین اسپتال،بڑے پیمانے پر ایمبولینس سروس جاری ہے۔اس کے علاوہ اسی فلاحی ادارے کی جانب سے نذیرحسین یونیورسٹی تعلیم کے شعبے میں عوام کی خدمت کررہی ہے۔کراچی کی طرح حیدرآبادمیں بھی نذیرحسین میڈیکل سینٹر،چائلڈاسپتال اورمختلف فلاحی مراکز بھی دن رات عوام کی خدمت کررہے ہیں۔اس کے علاوہ ملک کے دیگرشہروں میں بھی خدمت خلق فاوٴنڈیشن کی ایمبولینس سروس جاری ہے۔ الطاف حسین نے کہاکہ خدمت خلق فاوٴنڈیشن کی ان فلاحی اورامدادی سرگرمیاں قربانی کی کھالوں، زکوٰة، صدقات اورعوا م کے دیگر عطیات کی مددسے ہی کی جاتی ہیں۔ انہوں نے عوام سے اپیل کی کہ وہ عیدالاضحی کے موقع پر قربانی کے جانوروں کی کھالیں خدمت خلق فاوٴنڈیشن کودیں تاکہ وہ مزیدبہتراورموٴثراندازمیں اپنی فلاحی وامدادی سرگرمیوں کاسلسلہ جاری رکھ سکے اوران کادائرہ بڑھاسکے۔ دریں اثناء الطاف حسین نے پاکستان سمیت ملت اسلامیہ کو عید الاضحی کی دلی مبارکباد پیش کی ہے اور دعا کی ہے کہ اللہ تعالیٰ عید الاضحی کی رحمت ، برکت اور فضلیت کاتمام امہ مسلمہ پر خصوصی طور پرنزول فرمائے ۔عید الاضحی کے موقع پر اپنے پیغام میں الطاف حسین نے کہا کہ سنت ابراہیمی اللہ تعالیٰ کی خوشنودی اوراللہ تعالیٰ کی رضا کیلئے قیمتی سے قیمتی شے کی قربانی کا درس دیتی ہے اور اللہ تعالیٰ رضا و خوشنودی اسی میں ہے کہ اسکے بندوں کی خدمت کی جائے ، ضروتمندوں اور دکھی انسانوں کی مدد کی جائے اور محروم انسانوں کے اجتماعی مفادات کیلئے اپنے ذاتی مفادات اور انا کی قربانی دی جائے ۔ انہوں نے پاکستان بھر کے عوام سے اپیل کی ہے کہ وہ عید الاضحی کے موقع پر بلوچستان کے زلزلہ زدگان سمیت ملک بھر میں عید کی خوشیوں سے محروم غرباء ، مساکین ، بیواؤں ، یتیموں اور مستحق افراد کو نہ صرف یاد رکھیں بلکہ ان کی عملی اور ہرممکن مدد کریں ۔ انہوں نے پاکستان سمیت دنیا بھر میں مقیم ایم کیوایم کے ذمہ داران و کارکنان کو عید الاضحی کی دلی مبارکباد پیش کرتے ہوئے کہا کہ وہ حق پرستی کی تحریک کے شہداء کے لواحقین ، اسیروں اور لاپتہ کارکنوں کے اہل خانہ اور غریب و مستحق افراد کی دلجوئی کریں اور انہیں بھی عید کی خوشیوں میں شریک کریں ۔