دبئی … انٹرنیشنل کرکٹ کونسل نے ٹیسٹ کرکٹ کے کھلاڑیوں کی نئی عالمی درجہ بندی جاری کر دی، بیٹنگ میں سری لنکا کے کمار سنگاکار ا، باؤلنگ میں جنوبی افریقہ کے ڈیل سٹین اور آل راؤنڈرز میں بنگلہ دیش کے شکیب الحسن بدستور سرفہرست، بیٹنگ کے شعبے میں یونس خان دو درجے ترقی کے بعد چوتھے نمبر پر آ گئے، انگلینڈ کے خلاف تباہ کن باؤلنگ کرنے والے سعید اجمل باؤلنگ کے شعبے میں تیسرے نمبر پر آ گئے۔ آئی سی سی کے اعلامیے کے مطابق دبئی ٹیسٹ کے اختتام پر ٹیسٹ کرکٹ کے کھلاڑیوں کی نئی عالمی درجہ بندی جاری کر دی گئی ہے جس کے مطابق بیٹنگ کے شعبے میں سری لنکا کے کمار سنگاکارا پہلے، جنوبی افریقہ کے جیک کیلس دوسرے، ابراہم ڈی ویلیئرز تیسرے، پاکستان کے یونس خان دو درجے ترقی کے بعد چوتھے، انگلینڈ کے الیسٹر کک پانچویں، جوناتھن ٹراٹ چھٹے، ای این بیل ساتویں، سری لنکا کے تھیلان سمارا ویرا آٹھویں، بھارت کے سچن ٹنڈولکر نویں اور آسٹریلوی کپتان مائیکل کلارک دسویں نمبر پر ہیں۔ پاکستانی کپتان مصباح الحق چار درجے ترقی کے بعد 13ویں، اظہر علی 24ویں، محمد حفیظ 30ویں اور توفیق عمر 32ویں نمبر پر آ گئے۔ باؤلنگ کے شعبے میں جنوبی افریقہ کے ڈیل سٹین پہلے، انگلینڈ کے جیمز اینڈرسن دوسرے، پاکستان کے سعید اجمل دبئی ٹیسٹ میں تباہ کن باؤلنگ کے باعث آٹھ درجے ترقی کے بعد تیسرے نمبر پر آ گئے ہیں۔ انگلینڈ کے گریم سوان چوتھے، سٹیورٹ براڈ پانچویں، آسٹریلیا کے پیٹر سڈل چھٹے، بین ہیلفنہاس ساتویں، جنوبی افریقہ کے مورنی مورکل آٹھویں، بھارت کے ظہیر خان نویں اور بنگلہ دیش کے شکیب الحسن دسویں نمبر پر ہیں۔ پاکستان کے عبدالرحمن 14ویں، عمر گل 15ویں، اعزاز چیمہ 40ویں، جنید خان 52ویں اور محمد حفیظ 56ویں نمبر پر ہیں۔ آل راؤنڈرز میں بنگلہ دیش کے شکیب الحسن پہلے، جنوبی افریقہ کے جیک کیلس دوسرے، نیوزی لینڈ کے ڈینیل ویٹوری تیسرے، انگلینڈ کے سٹیورٹ براڈ چوتھے، آسٹریلیا کے شین واٹسن پانچویں، انگلینڈ کے گریم سوان چھٹے، ٹم برسنن ساتویں، جنوبی افریقہ کے ڈیل سٹین آٹھویں، آسٹریلیا کے پیٹرسڈل نویں اور مچل جانسن دسویں نمبر پر ہیں۔