کراچی … محمدرفیق مانگٹ…فرانسیسی اخبار L'Expressکے مطابق2002میں کراچی میں فرانسیسی انجینئروں کی بس پر حملے اور ان کی ہلاکت کی تفتیش کرنے والے انسداد دہشت گردی کے جج مارک ٹریوڈک نیوزی لینڈ کی کرکٹ ٹیم کے کھلاڑیوں سے رابطے کی کوشش کر رہے ہیں جو اس دھماکے کے چشم دید گواہ ہیں۔رپورٹ کے مطابق مئی 2002میں نیوزی لینڈ کی کرکٹ ٹیم پاکستان کے دورے پر تھی اور وہ اسی ہوٹل میں ٹھہرے تھے جہاں فرانسیسی انجینئر قیام پزیر تھے۔انسداد دہشت گرد جج مارک ٹریوڈک پاکستان میں کراچی حملے کی تحقیقات کے سربراہ ہیں انہوں نے اپنی توجہ نیوزی لینڈ کے ان کھلاڑیوں پر فوکس کی ہے ،فرانسیسی بس پر حملے کے وقت ہوٹل میں نیوزی لینڈ کی کرکٹ ٹیم کے کھلاڑیوں نے یوں ہی دھماکے کی آواز سنی تو ان میں سے زیادہ تر اپنے کمروں سے باہر نکلے اور اس کرائم سین کی تصاویر کھینچی تھیں۔جج ان دستاویز اور تصاویر کو اپنی تحویل میں لینا چاہتے ہیں تاکہ ان دستاویزات سے صورت حال واضح ہو سکے۔8مئی2002میں کراچی میں فرانسیسی بس پر حملے کے نتیجے میں11فرانسیسی انجینئروں سمیت14افراد ہلاک ہوئے تھے،اور یہ کیس ابھی تک تفتیش کاروں کے لئے معمہ بنا ہوا ہے۔