05 جون ، 2014 
کراچی : کٹی پہاڑی کے قریب دھماکا، ایک شخص جاں بحق، چار زخمی
05 جون ، 2014
کراچی…کراچی کے علاقے کٹی پہاڑی کے قریب دھماکے میں ایک شخص جاں بحق اور 4زخمی ہوگئے۔ تفصیلات کے مطابق کراچی میں کٹی پہاڑی کے قریب واقع مصطفی مسجد کے باہر ایک کھڑے ہوئے رکشے میں دھماکا ہوا جس کے نتیجے میں 5افراد زخمی ہوگئے۔ زخمیوں کو فوری طور پر عباسی شہید اسپتال منتقل کیا گیا جہاں پہنچ کر ایک زخمی چل بسا۔ دھماکے سے قریبی عمارات اور گاڑیوں کے شیشے ٹوٹ گئے۔ دھماکے کی آواز دور دور تک سنی گئی۔ نارتھ کراچی، نیو کراچی ،اورنگی ٹاوٴن اور فیڈرل بی ایریا میں دھماکے کی آواز سنائی دی۔دھماکے کے فوری بعد سیکیورٹی اداروں نے علاقے کو گھیرے میں لے لیا ہے۔ متاثرہ علاقے میں خوف وہراس پایا جاتا ہے۔ایس پی ساجد امیر کا کہنا ہے کہ ابتدائی معلومات کے مطابق دھماکا پلانٹڈ ڈیوائس کے ذریعے کیا گیا ہے۔
