اسلام آباد...... پاکستان میں قانون سازی اور اسمبلیوں کی کارکردگی پر نظر رکھنے والی غیر سرکاری تنظیم پلڈاٹ نے ایک رپورٹ جاری کی ہے جس کے مطابق گزشتہ ایک سال میں سندھ اسمبلی کی کارکردگی سب سے بہتر اور پنجاب اسمبلی کی سب سے کم تر رہی۔ پلڈاٹ نے صوبائی اسمبلیوں کی کارکردگی کے لیے دس معیار مقرر کئے اور ہر ایک کے لیے دس نمبر مختص کئے۔اس طریقہ کار کے تحت سندھ اسمبلی کو قانون سازی کے ضمن میں 10 میں سے 9 نمبر دئیے گئے۔پنجاب اسمبلی کو 8،خیبر پختونخوا کو 7 اور بلوچستان اسمبلی کو 6 نمبر ملے۔وزرائے اعلیٰ کی حاضری کے ضمن میں سندھ اور بلوچستان کے وزرائے اعلیٰ کو 10 میں سے 9،9 نمبر ملے جبکہ خیبرپختون خوا کے وزیر اعلیٰ کو 8 اور پنجاب کے وزیر اعلیٰ کو صرف 1 نمبر ملا۔مجموعی طور پر سندھ اسمبلی کی کارکردگی 100 نمبروں میں 69 نمبروں کے ساتھ سر فہرست رہی،خیبر پختونخوا اسمبلی 67 نمبروں کے ساتھ دوسرے نمبر پر رہی،بلوچستان اسمبلی 60 نمبروں کے ساتھ تیسرےا ور پنجاب اسمبلی کی کارکردگی 57 نمبروں کے ساتھ چوتھے نمبر پر رہی۔