لندن......متحدہ قومی موومنٹ کے قائد الطاف حسین نے راولپنڈی کے علاقے چٹیاں ہٹیاںمیںواقع امام بارگاہ میں بم دھماکے کی شدید الفاظ میں مذمت کی ہے اور بم دھماکے میں متعددافراد کے شہید وزخمی ہونے پرگہرے دکھ اور افسوس کااظہار کیا ہے ۔ ایک بیان میں الطاف حسین نے کہاکہ محفل میلادالنبی ؐ کے دوران امام بارگاہ میں بم دھماکہ کرنے والے خوارج ہیں جو مذہب کا نام لیکر قتل وغارتگری کرکے اللہ تعالیٰ اور نبی کریم ؐ کی تعلیمات کی صریحاً نفی کررہے ہیں۔ ایم کیوایم ، قرآن مجید کی تعلیمات کے مطابق ’’لااکراہ فی الدین ‘‘ پر یقین رکھتی ہے اور چاہتی ہے کہ ملک میں لبرل اور اعتدال پسندسوچ کو فروغ دیا جائے تاکہ مذہبی انتہاء پسند عناصر اپنی خودساختہ شریعت پاکستان کے عوام پر مسلط کرنے میں کامیاب نہ ہوسکیں۔ حق پرستی کی اس جدوجہدکی پاداش میں طالبان، القاعدہ اورداعش کے سفاک دہشت گردوں کی جانب سے کراچی اورصوبہ پنجاب کے مختلف شہروںمیں ایم کیوایم کے منتخب نمائندوں ، عہدیداروں اورکارکنوں کو سفاکی سے قتل کیاجارہا ہے لیکن افسوس کہ حکومت وانتظامیہ کی جانب سے نہ تو سفاک قاتلوں کو گرفتار کیاجارہا ہے اور نہ ہی عوام کی جان ومال کے تحفظ کیلئے مثبت اور عملی اقدامات کیے جارہے ہیں جس کی جتنی بھی مذمت کی جائے کم ہے ۔ الطاف حسین نے کہاکہ مذہبی انتہاء پسند دہشت گرد عناصر بم دھماکے اور قتل وغارتگری کرکے شمالی وزیرستان سمیت ملک بھر میں انتہاء پسند دہشت گردوں کے خلاف مسلح افواج کے جاری آپریشن کو ناکام بنانے کی سازش کررہے ہیں لہٰذا وقت کا تقاضہ ہے کہ ایسے سفاک عناصر اور انکی سازشوںکو سختی سے کچل دیا جائے ۔الطاف حسین نے وزیراعظم نوازشریف اور وزیرداخلہ چوہدری نثارعلی خان سے مطالبہ کیا کہ بم دھماکے کا فوری نوٹس لیا جائے اور ملوث عناصر اور ان کے سرپرستوں کو گرفتارکرکے قرارواقعی سزا دی جائے، ملک بھر کے اسکولوں کے ساتھ ساتھ مساجد اورامام بارگاہوں میں بھی مؤثرحفاظتی انتظامات کئے جائیں۔انھوں نے دھماکے میں شہید ہونے والے افراد کے سوگوارلواحقین سے دلی تعزیت وہمدردی کا اظہار کیا اور زخمیوںکی جلدومکمل صحت یابی کیلئے دعا کی۔دریں اثنا الطاف حسین نے اورنگی ٹاؤن میں طالبان اورلشکرجھنگوی کے مسلح دہشت گردوںکی فائرنگ سے ایم کیوایم اورنگی ٹاؤن سیکٹرکے کارکن ندیم احمد کے بہیمانہ قتل کی شدیدمذمت ہوئے کہا کہ ندیم احمد جنوری 2012ء میں عائشہ منزل پر ایم کیوایم کے جلسہ کے موقع پرہونے والے بم دھماکے میں زخمی ہوئے تھے اوروہ دہشت گردی کے اس واقعہ کے گواہ تھے ۔ندیم احمدشہیدنے سی آئی ڈی سینٹرمیں جاکربم دھماکے میں ملوث طالبان اورلشکرجھنگوی کے دہشت گردوں کو شناخت کیاتھا اورانہوں نے عدالت میں بھی کالعدم تنظیموںکے دہشت گردوں کے خلاف گواہی دی تھی جس کے بعد سے ندیم احمدکو ان دہشت گردوںکی جانب سے مسلسل دھمکیاں مل رہی تھیں ۔ الطاف حسین نے آرمی چیف جنرل راحیل شریف،وزیراعظم نوازشریفسمیت اعلیٰ حکام سے مطالبہ کیاکہ کراچی میںریاست کی رٹ کوچیلنج کرنے والے دہشت گردوں کے ساتھ سختی سے نمٹاجائے ، ایم کیوایم کے بے گناہ کارکنوں کے بہیمانہ قتل میں ملوث کالعدم تنظیموں کے ان دہشت گردوںکوفی الفورگرفتارکرکےقانون کے تحت سخت سے سخت سزادی جائے ۔