لندن.....متحدہ قومی موومنٹ کے قائد الطاف حسین نے مطالبہ کیاہے کہ آرمی پبلک اسکول پشاور کے معصوم بچوں کے درندہ صفت سفاک قاتلوں کے سرپرستوں کو گرفتارکرکے عبرتناک سزا دی جائے۔ ایک بیان میںانھوں نے کہاکہ 16، دسمبر2014ء کا دن پاکستان کی تاریخ کا سیاہ ترین دن ہے ، اس دن درندہ صفت سفاک دہشت گردوں نے آرمی پبلک اسکول کے معصوم بچوں اور اساتذہ کو دہشت گردی کا دہشت گردی کا نشانہ بناکر 142 ماؤں کی گودیں اجاڑدی لیکن افسوس کہ ایک ماہ گزرجانے کے باوجود معصوم کلیوں اورپھولوں کو گولیوں کا نشانہ بنانے والے سفاک قاتلوں کے سرپرست آج بھی قانون کی گرفت سے آزاد ہیں۔ الطاف حسین نے کہاکہ آرمی پبلک اسکول کے شہید طلبہ وطالبات کے والدین شدت غم سے نڈھال ہیں اور انصاف کی دہائیاں دے رہے ہیں ، حکمرانوں کا فرض ہے کہ شہداء کے والدین کے دکھوں کا مداوا کیاجائے اورانہیں انصاف فراہم کیاجائے۔الطاف حسین نے کہاکہ مجھے یقین ہے کہ معصوم بچوں کا لہو رائیگاں نہیں جائے گا اورمعصوم بچوں کے سفاک قاتلوں اور ان کے سرپرستوں پر اللہ تعالیٰ کاعذاب نازل ہوگا۔ الطاف حسین نے وزیراعظم نوازشریف، وزیرداخلہ چوہدری نثار ، خیبرپختونخواکے گورنر سردار مہتاب عباسی اور وزیراعلیٰ پرویز خٹک سے مطالبہ کیا کہ طلباء کو دہشت گردی کانشانہ بنانے والے سفاک قاتلوں کے سرپرستوں کو گرفتارکرکے عبرتناک سزا دی جائے اور ملک بھر کے تمام اسکولوں میں مؤثر حفاظتی اقدامات عمل میں لائے جائیں۔دریں اثنا الطاف حسین نے فرانسیسی قونصلیٹ کے قریب شرپسند عناصر کی فائرنگ سے غیرملکی خبررساں ایجنسی کے فوٹوگرافر آصف حسن اور ایک نجی ٹیلی وی کے کیمرہ مین عدیل کے زخمی ہونے پر گہری تشویش کااظہار کیا ہے اور ان کی جلد ومکمل صحت یابی کیلئے دعا کی ہے ۔ ایک بیان میں الطاف حسین نے حق پرست ماؤں ، بہنوں، بزرگوں اورکارکنوں سے اپیل کی کہ وہ فوٹو گرافرآصف حسن اور کیمرہ مین عدیل کی جلدومکمل صحت یابی کیلئے اللہ تعالیٰ کے حضورخصوصی دعا کریں۔