کراچی......متحدہ قومی موومنٹ کی رابطہ کمیٹی نے کراچی اور اسلام آباد سمیت ملک بھر میںپیٹرولیم مصنوعات کے مصنوعی بحران پر گہری تشویش کا اظہار کیاہے اورمطالبہ کیاہے کہ پیٹرولیم مصنوعات کے مصنوعی بحران سے نمٹنے کے لئے ہنگامی بنیادوںپراقدامات کیے جائیں۔ایک بیان میں رابطہ کمیٹی نے کہاکہ کراچی سمیت صوبہ پنجاب اور اسلام آباد کے بیشتر پیٹرول پمپس پر پیٹرول دستیاب نہیں ہے لیکن وفاقی وصوبائی سطح پراس بحران سے نمٹنے کے لئے کسی بھی قسم کے کوئی عملی اقدامات نظرنہیںآرہے اگر اس بحران پر قابو نہ پایا گیا تواس کے باعث قومی خزانے میں70فیصدسے زائدریونیوجمع کروانے والاشہرجو کہ پاکستان کامعاشی حب بھی ہے نہ صرف مفلوج ہوکر رہ جائے گابلکہ اس وجہ سے ملکی معیشت کو نقصان پہنچنے کا اندیشہ ہے ۔رابطہ کمیٹی نے کہاکہ ملک بھرخصوصا پنجاب کے عوام پیٹرول کے اس بحران کے باعث ا پنے روزمعمولات انجام دینے سے قاصر ہیں ، شہری دفاتر ،طلبہ اپنے تعلیمی اداروں اور کاروباری حضرات مارکیٹس اور تجارتی مراکز نہیں پہنچ پارہے ہیں جس کے باعث زندگی مفلوج ہو کررہ گئی ہے ، پیٹرول کا یہ بحران کراچی سمیت ملک بھر کے عوام کے خصوصاًکاروباری افرادکے لئے نہایت تشویش کا باعث ہے۔ رابطہ کمیٹی نے کہاکہ ملک بھر میں پیٹرولیم مصنوعات کے حالیہ بحران کو ختم کرنے کے لئے ہنگامی بنیادوںپراقدامات کیے جائیں، ملک کا سب سے بڑا صوبہ اس وقت پیٹرول کی عدم دستیابی کے باعث سخت مشکلات کا شکار ہے لیکن حکومتی ارکان کے روئیے کودیکھ کرایسامحسوس ہوتاہے کہ موجودہ حکمران ملک کے عوام سے ذرہ برابربھی ہمدردی نہیں رکھتے جس کے باعث وہ اس بحران کو ختم کرنے کے لئے سنجیدگی کا مظاہرہ نہیںکر رہے ہیں۔رابطہ کمیٹی نے کہاکہ ایم کیوایم کاملک کے عوام سے چولی دامن کاساتھ ہے لہٰذاایم کیوایم عوام کوکسی صورت تنہاء نہیںچھوڑے گی اورہرفورم پران کے جائز حق کے لئے آوازبلندکرتی رہے گی۔رابطہ کمیٹی نے وزیراعظم نوازشریف ، وزیرپیٹرولیم شاہد خاقان عباسی، گورنرسندھ ڈاکٹرعشرت العبادخان اورسندھ حکومت سے مطالبہ کیاکہ پنجاب سمیت ملک بھر میںپیٹرولیم کے سنگین بحران سے نمٹنے کے لئے بروقت اقدامات کیے جائیں۔