02 نومبر ، 2022 
02 نومبر ، 2022
جنوبی افریقا کے جارحانہ بلے باز ڈیوڈ ملر کا کہنا ہے کہ ہمیں معلوم ہے پاکستانی کپتان بابر اعظم بڑا اسکور نہیں کرپارہے اور ہم اس سے فائدہ اٹھانے کی کوشش کریں گے۔
سڈنی میں پریس کانفرنس کرتے ہوئے افریقی بیٹر نے کہا کہ جنوبی افریقی ٹیم مشکل صورتحال سے میچز جیتنا جانتی ہے، ٹی ٹوئنٹی میں ہر صورتحال کے لیے تیار رہنا پڑتا ہے۔
انہوں نے کہا کہ ہمارے پیس اٹیک نے گزشتہ چند ماہ میں زبردست پرفارمنس کا مظاہرہ کیا ہے، ہم برصغر کے اسپنرز کو کھیلنے کے لیے تیار ہیں، ورلڈ کپ کا ہر میچ اہم ہے اور پاکستان سخت ٹیم ہے۔
پریس کانفرنس میں ڈیوڈ ملر کا کہنا تھا کہ پاکستان کے پاس اچھے میچ ونرز ہیں، بابر اعظم اور رضوان کی وکٹیں جلد لے کر مڈل آرڈر پر پریشر ڈالنے کی کوشش کریں گے۔
ملر نے کہا کہ معلوم ہے کہ بابر بڑا اسکور نہیں کرپارہے، اس کا فائدہ اٹھانے کی کوشش کریں گے۔
جنوبی افریقی بیٹر نے یہ بھی کہا کہ پاکستان کے لیے ضروری ہے کہ وہ یہ میچ جیتیں اور وہ اس کی پوری کوشش کریں گے۔
خیال رہے کہ اگر بنگلادیش آج بھارت کو شکست دیتا ہے اور پاکستان اپنے بقیہ دونوں میچز جیت گیا تو قومی ٹیم کے سیمی فائنل میں پہنچنے کی اُمیدیں زندہ رہیں گی۔
واضح رہے کہ پاکستان اور جنوبی افریقا کا میچ سڈنی کرکٹ گراؤنڈ میں 3 نومبر جمعرات کو پاکستانی وقت کے مطابق دوپہر 1 بجے کھیلا جائے گا۔
